މާލެ ސިޓީ ކައުންސިލުން ޕާކިން ޒޯން ތަރައްޤީކުރުމަށްޓަކައި މާފަންނު ސަހަރާ ހުސްކުރުމުގެ މަސައްކަތް ފަށައިފިއެވެ.
މި މަސައްކަތް މިހާރު ކުރިއަށްދަނީ ލޭންޑް ސްކޭޕިން ސޮލިއުޝަނާ ހަވާލުކޮށްގެންނެވެ. ކައުންސިލުން މަޢުލޫމާތު ދީފައިވާ ގޮތުގައި، މި މަސައްކަތް ގާތްގަނޑަކަށް 60 ދުވަހުގެ ތެރޭގައި ނިންމާލެވޭނެއެވެ. އަދި އެތަނުން ނަގާ ގަބުރުތަކުގެ ކަށިތައް ނައްތާލުމުގެ މަސައްކަތް ކުރިއަށް ގެންދާނީ ކަނޑައެޅިފައިވާ އުސޫލުގެ ދަށުން އިސްލާމީ ކަންތައްތަކާ ބެހޭ ވުޒާރާގެ ބެލުމުގެ ދަށުންނެވެ.
މާފަންނު ސަހަރާގެ ބޮޑުމިނަކީ 36,153 އަކަފޫޓެވެ. މި ސަރަހައްދު އެއްކޮށް ހުސްކުރުމަށްޓަކައި، މިހާރު ވަނީ އެތަނުގެ އެތެރެ ނުފެންނާނެހެން ޓިނުޖަހައި ބަންދުކޮށްފައެވެ.
ގަބުރުސްތާނުތައް ހުސްކުރުމާ ގުޅޭގޮތުން އިސްލާމީ ފަތުވާދޭ އެންމެ މަތީ މަޖިލީހުން 2017 ވަނަ އަހަރު ނެރުނު ފަތުވާއެއްގައި ބަޔާންކޮށްފައިވާ ގޮތުގައި، ދުވަސްވެ އިންދިރާސްވެފައިވާ ގަބުރުސްތާނުތައް އިޙްތިރާމާއެކު ކޮނެ، އެ ތަންތަނުން ފެންނަ މިނިކަށިތައް އިޙްތިރާމާއެކު އެހެން ގަބުރުސްތާނެއްގައި ވަޅުލުމަށްފަހު، އެ ގަބުރުސްތާންތަކުގެ ބިން އާންމު މަޞްލަޙަތު ހިމެނޭ ކޮންމެ ކަމެއްގައި ބޭނުންކުރެވިދާނެއެވެ.
