ތުލުސްދޫގައި ހޮސްޕިޓަލަކާއި މެޑިކަލް ކޮލެޖެއް އަޅައިދޭނެ ފަރާތެއް ހޯދަން އިއުލާން ކޮށްފި

ކ. ތުލުސްދޫ ކައުންސިލުން އަމިއްލަ ޚަރަދުގައި މެނޭޖްކޮށް އޮޕަރޭޓްކުރާނެ 100 އެނދުގެ ހޮސްޕިޓަލަކާއި މެޑިކަލް ކޮލެޖެއް އަޅައިދޭނެ ފަރާތެއް ހޯދުމަށް އަނެއްކާވެސް އިޢުލާނުކޮށްފިއެވެ.

މި މަޝްރޫޢުއަށް ފުރަތަމަ އިޢުލާނުކޮށްފައިވަނީ މިއަހަރުގެ ޖުލައި މަހުގައެވެ. ނަމަވެސް އޭރު އެއްވެސް ފަރާތެއް ހޮވިފައިނުވާތީ، އަލުން އިޢުލާނުކުރަން ޖެހުނު ކަމަށް ކައުންސިލުން މަޢުލޫމާތު ދީފައިވެއެވެ.

މި މަޝްރޫޢުއަށް ޝައުޤުވެރިވާ ފަރާތްތަކަށް ހޮސްޕިޓަލާއި ކޮލެޖް އެޅުމަށް ބޭނުންވާ ބިން ދިގު މުއްދަތަކަށް ކުއްޔަށް ދިނުމަށް ކައުންސިލުން ނިންމާފައިވެއެވެ. ބިޑް ފޮތް ލިބެން ހުންނާނީ މިއަދުން ފެށިގެން އޮކްޓޯބަރު 2 ވަނަ ދުވަހުގެ 13:00 އާ ހަމައަށެވެ. ބިޑް ފޮތުގެ އަގަކީ 2،000 ރުފިޔާއެވެ. މި ފޮތުގައި މަޝްރޫޢުއާ ގުޅޭ މަޢުލޫމާތުގެ އިތުރުން ބިޑް ޕްރޮސެސިންގ ހިނގާނެ ގޮތުގެ ތަފްޞީލު ހިމެނިފައިވާނެ ކަމަށް ކައުންސިލުން ބުނެފައިވެއެވެ.

ބިޑް ހުށަހެޅުމުގެ ސުންގަޑިއަކީ އޮކްޓޯބަރު 13 ވަނަ ދުވަހުގެ 13:00 އެވެ. ތުލުސްދޫއަކީ ފަތުރުވެރިންގެ މެދުގައި މަޝްހޫރު ރަށެއްކަން ފާހަގަކޮށްލެވެއެވެ. މިހާރު ރާއްޖޭގައި މެޑިކަލް ކޮލެޖެއް ހިންގަމުން ދަނީ ހަމައެކަނި މާލޭގައި ހުންނަ ދަރުމަވަންތަ ހޮސްޕިޓަލުގައެވެ. މި މަޝްރޫޢު ފެށުމުން، ރާއްޖޭގައި ދެވަނަ މެޑިކަލް ކޮލެޖް ޤާއިމުވެގެންދާނެއެވެ.