ފެމެލީ ކޯޓުން ހާމަކުރި ތަފާސް ހިސާބުތަކުން ދައްކާ ގޮތުގައި، މިދިޔަ އޮގަސްޓް މަހު މާލޭގައި 186 ކައިވެނި ކުރެވުނު އިރު، 147 ވަރި ކުރެވިފައިވެއެވެ. ހަމަ މި މުއްދަތުގައި ވަރީގެ 188 މައްސަލަ ނިންމާފައިވާއިރު، އަދިވެސް 126 މައްސަލަ ވަނީ ނުނިމިއެވެ.
މި ނުނިމި ހުރި މައްސަލަތަކުގެ ތެރޭގައި ވަރިވުމަށް އެދި ހުށަހެޅި 84 މައްސަލައާއި، ވަރިކުރުމަށް އެދި ހުށަހެޅި 21 މައްސަލައާއި، ވަރި ސާބިތުކުރުމަށް ހުށަހެޅި 18 މައްސަލަ ހިމެނެއެވެ. މީގެ އިތުރުން ވަރިއާ މެދު ޝައްކުވެގެން ހުށަހެޅި 3 މައްސަލައެއްވެސް އަދި ވަނީ ނުނިމިއެވެ.
ފެމެލީ ކޯޓުން އިތުރަށް ހާމަކުރި ގޮތުގައި، މިދިޔަ މަހު ޖުމުލަ 237 މައްސަލައެއް ނިންމާފައިވެއެވެ. މީގެ ތެރޭގައި ވަރީގެ މައްސަލަތަކުގެ އިތުރުން، ކުދިންނާ ގުޅުންހުރި 51 މައްސަލައާއި، ޚަރަދު ދިނުމުގެ 23 މައްސަލައާއި، ގެވެށި އަނިޔާއާ ގުޅޭ 14 މައްސަލަ ހިމެނެއެވެ. އަދި އާއިލީ މައްސަލަތަކުގެ ގޮތުގައި ހުށަހެޅުނު 34 މައްސަލައެއްވެސް ނިންމާފައިވެއެވެ.
ކުޑަކުދިންނާ ގުޅުންހުރި މައްސަލަތަކުގެ ތެރެއިން އަދިވެސް ނުނިމި ހުރި މައްސަލަތަކުގެ ތެރޭގައި، ދަރިންނަށް ޚަރަދުކުރުމުގެ 16 މައްސަލައާއި، ކުއްޖާ އިޚްތިޔާރުކުރާ ފަރާތެއް ކަނޑައެޅުމުގެ 15 މައްސަލައާއި، ދަރިން ނުދެއްކުމުގެ 14 މައްސަލަ ހިމެނެއެވެ. މީގެ އިތުރުން، ކުޑަކުދިންގެ ޤާނޫނީ ބެލެނިވެރިކަން ފޮސްޓަރކުރާ ފަރާތްތައް ބަދަލުކޮށްދިނުމަށް އެދި ހުށަހަޅާފައިވާ 4 މައްސަލައެއް ކޯޓުން ބަލަމުން ގެންދާ ކަމަށްވެސް ފެމެލީ ކޯޓުން ބުނެފައިވެއެވެ.
