ހުޅުމާލޭގައި ދުއްވި ކާރެއްގެ ދަށުގެ މީހަކު މަރުމުގެ ހާދިސާއާއި ގުޅިގެން ކާރު ދުވަން އިން މީހާގެ މައްޗަށް ދައުވާކުރުމަށް ޕްރޮސިކިއުޓަރ ޖެނެރަލްގެ އޮފީހުން ނިންމައިފިއެވެ. މިއީ މިއަހަރުގެ އޭޕްރީލް މަހު ހުޅުމާލޭގައި ކާރަކާއި ސައިކަލެއް ޖެހުމުގެ ސަބަބުން ހިނގި އެކްސިޑެންޓެއްގައި، ސައިކަލުގައި ދަތުރުކުރި ބަންގްލަދޭޝްގެ ދެ ރައްޔިތަކަށް ލިބުނު ބޮޑެތި އަނިޔާތަކާ ގުޅޭ މައްސަލައެކެވެ. މި ހާދިސާގައި ދެމީހުންގެ ތެރެއިން އެކަކު ވަނީ މަރުވެފައެވެ.
ދަޢުވާ އުފުލިފައިވަނީ ކ. ކާށިދޫ، ކެތި، މަޢުޞޫމް ޙަލީމްގެ މައްޗަށެވެ. އޭނާގެ މައްޗަށް ޖުމްލަ ތިން ދަޢުވާއެއް ކުރުމަށް ވަނީ ނިންމާފައެވެ. މި ދަޢުވާތަކަކީ މީހަކު މަރުވެދިއުމުގެ ފަރުވާކުޑަ ޢަމަލެއް ކުރުމުގެ ދަޢުވާ، އަނިޔާއެއް ދިނުމުގެ ދަޢުވާ، އަދި މުދަލަށް ގެއްލުން ދިނުމުގެ ދަޢުވާއެވެ.
ޕްރޮސިކިއުޓަރ ޖެނެރަލްގެ އޮފީހުން ހާމަކުރި ގޮތުގައި، ފަރުވާކުޑަ ޢަމަލެއްގެ ސަބަބުން މީހަކު މަރުވުމުގެ ދަޢުވާއާއި އަނިޔާއެއް ދިނުމުގެ ދަޢުވާ ކުރަން ނިންމާފައިވަނީ، ކާރު ސިގްނަލް ނުދީ ގޯޅި އެޅި ވަގުތު، ކާރު އޯވަޓޭކް ކުރަން އުޅުނު ސައިކަލާ ޖެހި އެކްސިޑެންޓްވުމުން، ކާރުގެ ދަށުގައި ތާށިވި މަސްޢޫދުގެ ގައިމަތިން ކާރު ދުއްވުމުގެ ސަބަބުން އޭނާއަށް ލިބުނު އަނިޔާތަކާ ގުޅިގެންނެވެ.
މުދަލަށް ގެއްލުން ދިނުމުގެ ދަޢުވާ ކުރަން ނިންމާފައިވަނީ، ސައިކަލާ ޖެހުމުން ކާރު ކޮންޓްރޯލުން ނެއްޓި، އެ ސަރަހައްދުގައި ޕާކުކޮށްފައި އޮތް އެހެން ކާރަކާ ޖެހި، އެ ކާރަށް ގެއްލުން ލިބުމާ ގުޅިގެންނެވެ.
