މާލޭގައި އަންހެނަކު ރަހީނު ކުރި މައްސަލައިގައި ހައްޔަރުކުރެވުނު އާދަމް އަތުހަރު، ބަންދުގައި ހުއްޓާ މަރުވި ހާދިސާއާ ގުޅޭ އޮޓޯޕްސީގެ ނަތީޖާ ފުލުހުން ހާމަކޮށްފިއެވެ.
މިއަދު ބޭއްވުނު ނޫސްވެރިންގެ ބައްދަލުވުމުގައި ފުލުހުން ބުނިގޮތުގައި، އަތުހަރު މަރުވެފައިވަނީ އަމިއްލައަށް މަރުވާން ކުރި މަސައްކަތުގެ ސަބަބުންނެވެ. ނަމަވެސް، މި މައްސަލައާ ގުޅިގެން ނެޝަނަލް އިންޓެގްރިޓީ ކޮމިޝަނާއި ހިއުމަން ރައިޓްސް ކޮމިޝަނުން ތަޙުޤީޤު ކުރަމުންދާތީ، އިތުރު ތަފްސީލެއް ހާމަކުރެވެން ނެތްކަމަށް ފުލުހުން ވަނީ ބުނެފައެވެ.
އަތުހަރު ދޫނިދޫ ޖަލުގައި ބަންދުކޮށްފައި ހުއްޓާ އަމިއްލައަށް ދަންޖެހިގެން މަރުވި މަންޒަރު ފެންނަ ސީސީޓީވީ ފުޓޭޖް ފުލުހުން ވަނީ ނޫސްވެރިންނަށް ދައްކާފައެވެ. މި ވީޑިއޯގައި ފެންނަ ގޮތުން، އަތުހަރު ދަންޖެހެން މަސައްކަތްކޮށްފައިވަނީ އޭނާގެ ސޯޓުގެ ވާކޮޅެއް ބަންދުކޮށްފައި ހުރި ގޮޅީގެ ކުޑަދޮރުގައި އައްސައިގެންނެވެ.
ޖަލު ކެމެރާ މޮނިޓަރ ކުރަމުންދިޔަ ވަގުތު މި ހާދިސާ ފާހަގަކުރެވި، އަތުހަރު ވަނީ ވަގުތުން އައިޖީއެމްއެޗަށް ގެންދެވިފައެވެ. ނަމަވެސް، އައިސީޔޫގައި ފަރުވާދެމުންދަނިކޮށް މި މަހުގެ 2 ވަނަ ދުވަހުގެ ހަވީރު 4:08 ގައި އަތުހަރު ވަނީ ނިޔާވެފައެވެ.
މި ހާދިސާއާ ގުޅިގެން ގިނަ ބަޔަކު ވަނީ ފުލުހުންނާއި ކަރެކްޝަންސްގެ އޮފިސަރުންނަށް ތުހުމަތުކޮށް އެކި ވާހަކަތައް ދައްކާފައެވެ. އެހެންނަމަވެސް، މިހާރު ތަޙުޤީޤު ކުރިއަށްދާތީ، އިތުރު މަޢުލޫމާތު ހާމަކުރުމަށް ނެތްކަމަށް ފުލުހުން ވަނީ ބުނެފައެވެ.
