މާލޭގައި އިމިގްރޭޝަން އޮފިސަރެއްގެ ގޮތުގައި މަކަރު ހަދައިގެން ބިދޭސީއެއްގެ އަތުން ފޯނާކާއި ފައިސާ ފޭރިގަތް މީހާ ހައްޔަރުކޮށްފިއެވެ.
ފުލުހުން މަޢުލޫމާތު ދީފައިވާ ގޮތުގައި، އިއްޔެ ރިޕޯޓުކުރެވުނު މި ހާދިސާގައި ތިން މީހަކު އިމިގްރޭޝަން އޮފިސަރުންކަމަށް ބުނެ، ބިދޭސީން ދިރިއުޅޭ ތަނަކަށް ވަދެ، ބަންގްލަދޭޝް މީހެއްގެ އަތުން މޯބައިލް ފޯނަކާއި 9000 ރުފިޔާ ފޭރިގަނެފައިވެއެވެ.
މި މައްސަލައާ ގުޅިގެން ފުލުހުން ވަނީ ކޯޓު އަމުރެއްގެ ދަށުން ގ. ބެރުގޭ މުޙައްމަދު ނަވީން (44 އަހަރު) ހައްޔަރުކޮށްފައެވެ. މި ހާދިސާއާ ގުޅޭގޮތުން އިމިގްރޭޝަން ކޮންޓްރޯލަރ މުޙައްމަދު ޝަމްއާން ވަޙީދު ވަނީ އާންމުންނަށް މުހިންމު މަޢުލޫމާތުތަކެއް ދެއްވާފައެވެ. އޭނާ ވިދާޅުވިގޮތުގައި އިމިގްރޭޝަންގެ ރަސްމީ ރެއިޑްތަކުގައި އޮފިސަރުންގެ އައިޑީ ފެންނަގޮތަށް ހުންނާނެއެވެ. އަދި މިހާރު ކުރިއަށްދާ އޮޕަރޭޝަންތަކަކީ ޔުނީފޯމު ލައިގެން ކުރިއަށްގެންދާ އޮޕަރޭޝަންތަކެއްކަމަށްވެސް އޭނާ ވިދާޅުވިއެވެ.
މިކަމާ ގުޅިގެން، އާންމުން ވަރަށް ބޮޑަށް ސަމާލުވުމަށާއި، ޝައްކުކުރެވޭ ހާލަތްތަކުގައި ވަގުތުން ފުލުހުންނަށް އެންގުމަށް އިލްތިމާސް ކޮށްފައިވެއެވެ.
