މާލޭގެ ސްކޫލަކަށް ވަދެ އަޑުގަދަކޮށް ބައެއް ޓީޗަރުންނަށް ބިރުދެއްކި ކަމުގެ ތުހުމަތުގައި މިދިޔަ މަހު ހައްޔަރުކުރެވުނު 41 އަހަރުގެ ދިވެހި ފިރިހެނާއާ ދެކޮޅަށް ދައުވާކުރުމަށް އިއްޔެ ޕްރޮސެކިއުޓަރ ޖެނެރަލްގެ އޮފީހަށް ފޮނުވައިފިއެވެ.
މި ހާދިސާ ހިނގާފައިވަނީ މިދިޔަ މަހުގެ 6 ޗަނަ ދުވަހުއެވެ.
މި މައްސަލައިގައި ތުހުމަތުކުރެވޭ ފަރާތް ފުރަތަމަ 30 ދުވަހަށް ބަންދުކުރުމަށް ކްރިމިނަލް ކޯޓުން އަމުރުކުރި އެވެ. އޭގެފަހުން އިތުރު ބަންދު މުއްދަތެއް ދިނުމަށްފަހު، އިއްޔެ އަނެއްކާވެސް އިތުރު 15 ދުވަހަށް އޭނާގެ ބަންދު މުއްދަތު އިތުރުކޮށްފައިވެއެވެ.
ކޯޓުގައި ފުލުހުން ބުނެފައިވަނީ، މި މައްސަލައިގައި ދައުވާކުރުމާމެދު ޕްރޮސެކިއުޓަރ ޖެނެރަލްގެ އޮފީހުން ގޮތެއް ނިންމުމުން، އެ މީހާ ޝަރީއަތް ނިމެންދެން ބަންދުގައި ބެހެއްޓުމާމެދު ގޮތެއް ނިންމުމަކީ އެންމެ ރަނގަޅު ގޮތްކަމަށެވެ.
ކޯޓު އަމުރުން އެނގޭ ގޮތުގައި، މި މީހާ ސްކޫލު ތެރެއަށް ވަދެ ބައެއް ޓީޗަރުންނަށް ބިރުދެއްކިކަމަށް ސްކޫލުގެ ބައެއް މުވައްޒަފުން ހެކިބަސް ދީފައިވެއެވެ. ނަމަވެސް އެއްވެސް މީހެއްގެ ގައިގައި އަތްލާފައިނުވާކަމަށް އެ މުވައްޒަފުން ބުނެފައިވެއެވެ. މި ހާދިސާ ހިނގާފައިވަނީ ސްކޫލު ދަރިވަރުންގެ ކުރިމަތީގައެވެ.
ކޯޓު އަމުރުގައި ފާހަގަކޮށްފައިވާ ގޮތުގައި، މި މައްސަލައިގައި ތުހުމަތުކުރެވޭ ފަރާތަކީ ބިރުދެއްކުމުގެ މައްސަލަތަކުގެ ކުށުގެ ރެކޯޑު އޮތް މީހެކެވެ. މި ހުރިހާ ސަބަބުތަކަށްޓަކައި، އޭނާ އިތުރު 15 ދުވަހަށް ބަންދުކުރުމަށް އިއްޔެ ކްރިމިނަލް ކޯޓުން އަމުރުކޮށްފައިވެއެވެ.
