ދަރިވަރުންގެ ލޯނު ކަންތައްތަކަކީ އެންމެ އިސްކަމެއް ދޭ ކަންތައްތަކުގެ ތެރެއިން ކަމެއްކަމަށް ސަރުކާރުން ބުނެފިއެވެ. އަދި ކުރިއަށް އޮތް ތަނުގައިވެސް އެއްވެސް ހުރަހަކާ ނުލައި ސްޓޫޑެންޓް ލޯނު ލިބެމުންދާނެ ކަމުގެ ޔަގީންކަން ދީފައެވެ.
ސަރުކާރުން މިކަން ހާމަކޮށްފައިވަނީ، އަލަށް ލޯނު ހަމަޖެހުނު ދަރިވަރުންނަށް ފައިސާ ދޫކުރުން ލަސްވެ، އެކަމާ ގުޅޭ ޝަކުވާތައް އިތުރުވަމުން ދާ ދަނޑިވަޅެއްގައެވެ.
ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމެއްގައި މިކަމާ ގުޅޭ ސުވާލަކަށް ޖަވާބުދެއްވަމުން، ރައީސް އޮފީހުގެ ތަރުޖަމާން ހީނާ ވަލީދު ވިދާޅުވީ ދަރިވަރުންގެ ލޯނު ކަންތައްތަކަކީ ސަރުކާރުން އެންމެ އިސްކަމެއް ދޭ ކަންތައްތަކުގެ ތެރެއިން ކަމެއް ކަމަށެވެ.
ވަކިން ޚާއްޞަކޮށް، ދަރިވަރުންގެ ތަޢުލީމަށް ހުރަސް ނޭޅޭނެ ގޮތަށް ފައިސާ ލިބޭނެ މަގު ތަނަވަސްކޮށްދިނުމަށް ވަރަށް ބޮޑު އަހައްމިއްޔަތުކަމެއް ދޭކަމަށް އޭނާ ފާހަގަކުރެއްވިއެވެ. "އިރާދަކުރެއްވިއްޔާ ކުރިއަށް އޮތްތަނުގައިވެސް، ކުރިން ލިބެމުންދިޔަ ފަދައިން، އެއްވެސް ދަތިކަމަކާ ނުލައި ހުރިހާ ދަރިވަރުންނަށްވެސް ސްޓޫޑެންޓް ލޯނު ލިބެމުންދާނެ" ކަމަށް ހީނާ ވިދާޅުވިއެވެ.
ނަމަވެސް، އަލަށް ލޯނު ހަމަޖެހުނު ދަރިވަރުންނަށް ފައިސާ ދޫކުރުން ލަސްވުމާ ގުޅިގެން ޝަކުވާތައް އިތުރުވެފައިވާއިރު، ކުރީގެ ސަރުކާރުގައި ލޯނު ލިބި ކިޔަވަމުންދާ ދަރިވަރުންނަށްވެސް ގަވާއިދުން ފައިސާ ނުލިބޭކަމުގެ ޝަކުވާތައް އުފުލިފައިވެއެވެ.
ކުރީގެ ސަރުކާރު ފަދައިން، މި ސަރުކާރުންވެސް މިފަހަރު ނިންމާފައިވަނީ ޝަރުތު ފުރިހަމަވާ ހުރިހާ ދަރިވަރުންނަށްވެސް ލޯނު ދިނުމަށެވެ.
