ހުސްވެފައިވާ ޕްރޮސެކިއުޓަރ ޖެނެރަލް (ޕީޖީ) ގެ މަގާމަށް ރައީސުލްޖުމްހޫރިއްޔާ ހުށަހަޅުއްވާފައިވާ ހައި ކޯޓުގެ ކުރީގެ ފަނޑިޔާރު އައްބާސް ޝަރީފުގެ އާއި އިންޓަރވިއު ކުރުމަށް މިއަދު މެންދުރު 13:00 އަށް ޖުޑިޝަރީ ކޮމިޓީން ތާވަލް ކޮށްފިއެވެ.
މީގެ ކުރިން، އައްބާސްގެ މަނާމެދު ޝަކުވާ ހުށަހެޅުމުގެ ފުރުސަތު މިއަދު މެންދުރު 12:00 އާ ހަމައަށް ވަނީ ހުޅުވާލާފައެވެ.
އައްބާސް ޝަރީފަކީ ޔުނިވާސިޓީ އޮފް ޓެސްމޭނިއާ އިން ގާނޫނީ ދާއިރާއިން މަތީ ތައުލީމު ހާސިލުކުރައްވާފައިވާ ބޭފުޅެކެވެ. އަދި 2011 އިން 2015 އަށް ހައިކޯޓުގެ ފަނޑިޔާރުކަން ކުރައްވާފައިވެއެވެ.
ޕްރޮސެކިއުޓަރ ޖެނެރަލްގެ މަގާމު ހުސްވެފައި މިވަނީ، އެ މަގާމުގައި ހުންނެވި ހުސައިން ޝަމީމް ވަކިކުރުމަށް ރައްޔިތުންގެ މަޖިލީހުން މިދިޔަ މަހުގެ 22 ވަނަ ދުވަހު ފާސްކުރުމާ ގުޅިގެންނެވެ.
