ނ. ވެލިދޫގައި ފުޅާ ދާއިރާއެއްގައި ހިންގަމުންދިޔަ މަސްތުވާތަކެތީގެ ވިއުގައެއް ފުލުހުން ނައްތާލައި، އެ ވިއުގައިގައި ހިމެނޭ ހަތް މީހަކު ހައްޔަރުކޮށްފިއެވެ. ހައްޔަރުކުރެވުނު އެންމެންނަކީވެސް ވެލިދޫ މީހުންނެވެ.
ފުލުހުންގެ ޑްރަގް އެންފޯސްމަންޓް، ކައުންޓަރ ނާކޮޓިކްސް އިންޓެލިޖެންސް އަދި ނޯތު ޕޮލިސް ފުލުހުން ގުޅިގެން އިއްޔެ ވެލިދޫގައި ހިންގި މި އޮޕަރޭޝަނުގައި، ރަށުގެ ބައެއް ގޭގެ ބަލައި ފާސްކުރުމަށްފަހު މަސްތުވާތަކެތި ކަމަށް ބެލެވޭ 1547.44 ގްރާމްގެ އެއްޗެހި ހޯދާފައިވެއެވެ. މީގެ އިތުރުން 50،000 އަށްވުރެ ގިނަ ދިވެހި ރުފިޔާއާއި އެމެރިކާ ޑޮލަރުވެސް ފުލުހުންނަށް ލިބިފައިވެއެވެ.
އޮޕަރޭޝަނުގައި ހައްޔަރުކުރެވުނު ހަތް މީހުން ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، އެކަކު ދޫކޮށްލުމަށް ކޯޓުން ނިންމިއެވެ. ދެން ތިބި ހަ މީހުންގެ ތެރެއިން އަޙްމަދު މުރުޝިދު (35އ) އަށް ދުވަހަށް ބަންދުކުރުމަށް އަމުރުކުރިއެވެ. އަދި އަބްދުﷲ ނިޝާދު (26އ)، އަޙްމަދު އަސީމް (26އ)، އަޙްމަދު ނައުޝާދު (28އ)، އަލީ ރަޝީދު (30އ) އަދި މުޙައްމަދު މާއިދު (28އ) ފަސް ދުވަހަށް ބަންދުކުރުމަށް އަމުރުކޮށްފައިވެއެވެ.
ފުލުހުން ބުނި ގޮތުގައި، މި އޮޕަރޭޝަނުގައި ހައްޔަރުކުރެވުނު ހަތް މީހުންގެ އިތުރުން އިތުރު ބަޔަކުވެސް ބަލައި ފާސްކޮށްފައިވެއެވެ. އަދި މި މައްސަލަ އިތުރަށް ތަޙުޤީޤުކުރަމުންދާ ކަމަށްވެސް ފުލުހުން މަޢުލޫމާތު ދީފައިވެއެވެ.
