ގދ. ތިނަދޫ އަށް އުފަން މީހަކު 100 ވަނަ ފަހަރަށް ހައްޔަރުކޮށްފިއެވެ.
މި މައްސަލައިގައި ހައްޔަރު ކުރީ އުމުރުން 33 އަހަރުގެ ދިވެހި ފިރިހެނެކެވެ. އެމީހާ އެންމެ ފަހުން ހައްޔަރު ކުރީ ވައްކަމުގެ މައްސަލައެއްގައެވެ.
އެ ފިރިހެން މީހާގެ ބަންދާ މެދުގައި ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން ބަންދަށް ވަނީ 15 ދުވަސް ޖަހައިފައެވެ.
ބަންދު އަމުރުގައި ބުނެފައި ވަނީ އޭނާއަކީ މިބާވަގުތެ ކުށްތަކާއި، އެހެނިހެން ކުށްތަކުގެ ރެކޯޑް ގިނަ އަދަދަކަށް އޮތް މީހެއް ކަަމަށެވެ. އެގޮތުން 99 ފަހަރު އޭނާ ހައްޔަރުކޮށް، 39 ފަހަރު ބަންދަށް ބަދަލުކޮށްފައިވާ ކަން ރިކޯޑުތަކަށް ބެލުމުން އެނގެން އޮންނަ ކަމަށް ބުނެފައިވެއެވެ.
މި މީހާ ވައްކަމުގެ މައްސަލައެއްގައި އެންމެ ފަހުން ހައްޔަރު ކުރިއިރު، އޭނާ ލައިގެން ހުރި ފަޓުލޫނު ޖީބުން ހަތަރު ގަޑި އާއި ވަގަށް ނަގާފައިވާ ފޯނެއް ފެނިފައިވާ ކަމަށް ވެސް ކޯޓު އަމުރުގައިވެއެވެ.
