ޕްރޮސެކިއުޓަރ ޖެނެރަލް (ޕީޖީ) މަޤާމަށް ކުރިމަތިލުމުގެ މުއްދަތު މިއަދު މެންދުރު 12:00 އަށް ހަމަވިއިރު، ތިން ބޭފުޅަކު ފޯމު ހުށަހަޅުއްވައިފިއެވެ. އެއީ:
1. ރައީސް އޮފީހުގެ ލީގަލް ސެކްރެޓަރީ އަދި ކުރީގެ ހައިކޯޓު ފަނޑިޔާރު އައްބާސް ޝަރީފް
2. ކްރިމިނަލް ކޯޓުގެ ކުރީގެ އިސްޤާޟީ އަޙްމަދު ހައިލަމް
3. ކުރީގެ ޑެޕިއުޓީ ޕްރޮސެކިއުޓަރ ޖެނެރަލް މަރްޔަމް ނިހާޔަތު
މި މަޤާމު ހުސްވީ ކުރީގެ ޕީޖީ ޙުސައިން ޝަމީމް މަޖިލީހުން ވަކިކުރުމާ ގުޅިގެންނެވެ. ޝަމީމް ވަކިކުރެވުނީ ކުރީގެ ސަރުކާރުގެ އިސްވެރިންގެ މައްޗަށް އުފުލާފައިވާ ދަޢުވާތަކެއް އަނބުރާ ގެންދިއުމާ ގުޅޭ މައްސަލައެއްގައެވެ.
ޕީޖީގެ މަޤާމަށް މީހަކު ޢައްޔަންކުރުމުގެ މަރުޙަލާ:
1. ރައީސުލްޖުމްހޫރިއްޔާ ނަންތަކެއް މަޖިލީހަށް ހުށަހެޅުއްވުން
2. މަޖިލީހުން އެ ނަންތަކުގެ ތެރެއިން ބޭފުޅަކަށް ރުހުން ދެއްވުން
3. ރައީސުލްޖުމްހޫރިއްޔާ އެ ބޭފުޅަކު ޢައްޔަންކުރެއްވުން
ޕީޖީ މަޤާމަށް ބޭފުޅަކު ޢައްޔަންކުރުމަށް މަޖިލީހުގެ ދައުރުން ބޭރު ޖަލްސާއެއް މިރޭ ބޭއްވުމަށް ވަނީ ހަމަޖެހިފައެވެ. ޤާނޫނުގައިވާ ގޮތުން މަޤާމު ހުސްވާތާ 30 ދުވަހުގެ ތެރޭގައި އައު ޕީޖީއެއް ޢައްޔަންކުރަންޖެހެއެވެ. މިހާތަނަށް އެއްވެސް ޕީޖީއަކަށް ފަސް އަހަރުގެ ދައުރެއް ފުރިހަމަ ނުކުރެވޭކަން ފާހަގަކުރެވެއެވެ.
