ސޯސަން މަގުގައި ހުންނަ ގާމަގު ކެފޭގައި އިއްޔެ ހިނގި އަލިފާނުގެ ހާދިސާ އާ ގުޅިގެން އެ ކެފޭ ހުރި ގެ ތަޅާލުމުގެ މަސައްކަތް ފަށައިފިއެވެ.
ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާއިން ބުނީ އަލިފާނުގެ ހާދިސާ ހިނގި ގާމަގު ކެފޭ ހުރި ހ. ނޫހިމެރިގެ ތަޅައިލުމުގެ މަސައްކަތް އެ ވުޒާރާހެ ޑިޒާސްޓަރ ވޯރކްސް ޑިޕާޓްމެންޓުން ފަށާފައިވާ ކަމަށެވެ.
އިއްޔެ ހިނގި އަލިފާނުގެ ހާދިސާގެ ސަބަބުން 57 މީހަކު ހާލުގައި ޖެހުނެވެ. އެއީ 37 ދިވެހިންނާއި 20 ބިދޭސީންނެވެ. އަލިފާނުގެ ހާދިސާގައި ރޯވި ގެއާ ޖެހިގެން ހުރި ރީފްވިއު އާއި ސައުތު އެންޑް ގެއަށް ވެސް އަލިފާނުގެ އަސަރު ކުރިއެވެ.
ހާދިސާގައި ހާލުގައި ޖެހުނު މީހުންނަށް އެހީވުމުގެ ގޮތުން ސަރުކާރުން ދެ ލައްކައެއްހާ ރުފިޔާ ދީފައިވާ ކަމަށް ނޭޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އިން ބުނެފައިވެއެވެ.
ގާމަގު ކެފޭ ހުންނަ އިމާރާތުގައި ތިން ފްލޯ ހުރެއެވެ. އެ އިމާާރާތުގެ މަތީ ދެ ފްލޯ ހަދާފައި ހުރީ ޑެގު އަޅައި ވަށައިގެން ޓިނު ޖަހައިގެންނެވެ. އެއީ ބިދޭސީން އެކޮމޮޑޭޝަނެއްގެ ގޮތުގައި ބޭނުން ކުރަމުން އަންނަ ތަނެކެވެ. މި ހާދިސާގައި އެ ތަން ވަނީ ބޭނުން ނުކުރެވޭ ވަރަށް އަނދައިފައެވެ.
އަލިފާނުގެ ހާދިސާ ހިނގާފައި ވަނީ އިއްޔެ މެންދުރު ތިނެއް ޖަހާކަން ހާއިރެވެ. އަލިފާނުގެ ހާދިސާ ހިނގިތާ ގަޑިއިރެއްހާއިރު ފަހުން އަލިފާންގަނޑު ކޮންޓްރޯލް ކުރިއިރު، އެއްވެސް މީހަކަށް ބޮޑު އަނިޔާއެއް ނުލިބެއެވެ. އެކަމަކު، ދުމުގެ އަސަރުކޮށްގެން ބައެއް މީހުންނަށް ފަރުވާ ދޭން ޖެހުނެވެ.
