އަންނަ އަހަރުން ފެށިގެން ޤައުމީ އެތުލީޓުންނާއި އޮފިޝަލުންނަށް އިންޝުއަރެންސް ދޭން ސަރުކާރުން ނިންމައިފިއެވެ. މި މަޢުލޫމާތު ހާމަކުރެއްވީ މިއަދު ރައީސް އޮފީހުގައި ކުރިޔަށްދާ ނޫސްވެރިންގެ ބައްދަލުވުމުގައި ކުޅިވަރާ ބެހޭ ވަޒީރު އަބްދުﷲ ރަފީޢުއެވެ.
ރަފީޢު ވިދާޅުވީ، ޤައުމީ އެތުލީޓުންނާއި ކުޅުންތެރިންނާއި އޮފިޝަލުންގެ މުސާރަ އެއްވަރުކޮށް އިތުރުކުރުމުގެ މަސައްކަތް ކުރަމުންދާ ކަމަށާއި، ޤައުމީ އެތުލީޓުންނާއި އޮފިޝަލުންނަށް މުސާރަ ދޭ އުސޫލު ރިވިއުކުރުމުގެ މަސައްކަތް ކުޅިވަރާ ބެހޭ ޤައުމީ މަޖިލީހުން ކުރަމުންދާ ކަމަށެވެ. މީގެ އިތުރުން، ޤައުމީ އެތުލީޓުންނާއި އޮފިޝަލުންނަށް އިންޝުއަރެންސް ދިނުމަށްޓަކައި އަންނަ އަހަރުގެ ބަޖެޓުގައި އެކަމަށް ބޭނުންވާ ފައިސާ ހަމަޖެއްސުމަށް ހުށަހަޅުއްވާނެކަންވެސް ރަފީޢު ފާހަގަކުރެއްވިއެވެ.
ރަފީޢު އިތުރަށް ވިދާޅުވީ، އަންނަ އަހަރު އެތުލީޓުންނާއި އޮފިޝަލުންނަށް އިންޝުއަރެންސް ހަމަޖެހި ދެވެން ފަށާނެ ކަމަށް އުންމީދުކުރައްވާ ކަމަށެވެ.
