ވީދިގެން ގޮސްފައިވާ ޤައުމީ ފޭރާން އައު ކުރުމަށް ރައީސްގެ ޚާއްސަ އިރުޝާދާ ލަފާފުޅާ އެއްގޮތަށް ދައުލަތުގެ މުއައްސަސާތަކުން ކުރަމުން އަންނަ މަސައްކަތްތަކުގެ ތެރެއިން، ޓެލެގްރާމްގައި ގިނަ އަދަދެއްގެ ޗެނަލް ކްރިއޭޓްކޮށް ރާއްޖެ އާއި ރާއްޖެއިން ބޭރުގެ އެކި މީހުންގެ ބަރަހަނާ މަންޒަރު ދައްކުވައިދޭ ފޮޓޯއާއި ވީޑިއޯ، އެ ޗެނަލްތައް މެދުވެރިކޮށް ޕޯސްޓުކޮށް ވިޔަފާރީގެ އުސޫލުން މާލީ މަންފާ ހޯދަމުންގެންދާ މައްސަލައާ ގުޅިގެން ފުލުހުންގެ ސައިބަރ ކްރައިމް ސެންޓަރުން ހިންގި ޚާއްސަ އޮޕަރޭޝަންގެ ދަށުން މިހާތަނަށް 571 ޓެލެގްރާމް ޗެނަލް ފުލުހުންގެ ބެލުމުގެ ދަށަށް ގެނެސްފިއެވެ.
މި އޮޕަރޭޝަނާއި ގުޅިގެން ތިން މީހަކު ހައްޔަރުކޮށްފަވާއިރު މި ތިން މީހުންގެ އަތުން މައްސަލައާ ގުޅުން ހުރި 14 ޑިޖިޓަލް އިލެކްޓްރޯނިކް އާލާތް ބަލާ ފާސްކޮށްފައިވެއެވެ. އަދި މި މީހުންގެ ނަމުގަ ކްރިއޭޓްކޮށްފައިވާ ޓެލެގްރާމް 09 އެކައުންޓް ފުލުހުންގެ ބެލުމުގެ ދަށަށް ގެނެސް ސީޒްކޮށްފޮޓޯ އާއި ވީޑިއޯ ހިމެނޭ 571 ޗެނަލް ގެނެވި ސީޒްކޮށްފައިވެއެވެ.
ފުލުހުންގެ ހިންގި މި ޚާއްސަ އޮޕަރޭޝަނުގެ ތެރެއިން މި ޗެނަލްތަކުގައި ރާއްޖޭގެ އަންހެނުންގެ ބަރަހަނާ މަންޒަރު ދައްކުވައިދޭ 241651 ފޮޓޯ އާއި 86618 ވީޑިއޯ ޕޯސްކޮށްފައިވާކަން ކަށަވަރުކުރެވުނެއެވެ. މީގެ ތެރޭގައި 18 އަހަރުން ދަށުގެ ކުޑަކުދިންގެ ފޮޓޯ އާއި ވީޑިއޯވެސް ހިމެނެއެވެ. އަދި ކުޑަކުދިންގެ އޮރިޔާން މަންޒަރު ދައްކުވައިދޭ ފޮޓޯ އަދި ވީޑިއޯތައް ޕޯސްޓްކުރުމަށް 43 ޗެނަލް ހިންގާފައިވާކަން ފުލުހުންގެ ތަހުގީގުން ދައްކާއިރު މި ޗެނަލްތަކަށް ވަދެ ފައިސާ ދައްކައިގެން 3468 މީހުން ޗެނަލްތަކަށް ސަބްސްކްރައިބްކޮށްފައިވާ ކަމަށް މިހާތަނަށް ތަހުގީގަށް ހޯދިފައިވެއެވެ.
މި މައްސަލާގައި ތުހުމަތު ކުރެވޭ މީހުން މިގޮތަށް ސަބްސްކްރިޕްޝަން ފީގެ ގޮތުގައި 2 މިލިއަނެއްހާ ފައިސާގެ އާމްދަނީއެއް ނަހަމަ ގޮތުގައި ހޯދާފައިވާކަންވެސް ފުލުހުންގެ ތަހުގީގަށް ފާހަގަކުރެވިފައިވެއެވެ.
މި މައްސަލައާ ގުޅިގެން ހައްޔަރުކޮށްފައިވަނީ އދ. މަހިބަދޫ، ބަހާރުގެ، ޒުބައިރު ޢަލީ (45އ)، ކ. މާލެ، ދަފްތަރު ނަންބަރު ރސ14751 ނާޞިފް ޢަލީ (46އ) އަދި ކ. ކާށިދޫ، ސިލިންކޯ، އިސްމާޢީލް ރަބީޙް (29އ)އެވެ.
މި މީހުންގެ ބަންދާމެދު ގޮތެއް ނިންމުމަށް އެކި ދުވަސް މަތިން އެކި ފަހަރު ކޯޓަށް ހާޒިރުކުރުމުން ބަންދުގައި ބޭތިއްބުމަށް އަމުރުކޮށްފައިވެއެވެ. އެގޮތުން، އދ. މަހިބަދޫ / ބަހާރުގެ، ޒުބައިރު ޢަލީ މިހާތަނަށް ހަތަރު ފަހަރެއްގެ މަތިން ކޯޓަށް ހާޒިރުކޮށްފައިވެއިވެެ. އަދި އޮގަސްޓު މަހުގެ 30 ވަނަ ދުވަހު ކޯޓަށް ހާޒިރުކުރުމުން 15 ދުވަހަށް ބަންދުކުރުމަށް އަމުރުކޮށްފައިވެއެވެ.
