ރައީސް ޑރ. މުހައްމަދު މުއިއްޒު މިއަދު ވިދާޅުވެފައިވަނީ ޑިޖިޓައިޒޭޝަނަކީ ގައުމީ ތަސައްވަރުގެ ބިންގަލެއް ކަމަށެވެ. އެމަނިކުފާނު މިފަދައިން ވިދާޅުވީ "ސަމިޓް އޮފް ދަ ފިއުޗާ" ގެ ސައިޑް އިވެންޓްގައި ދެއްކެވި ވާހަކަފުޅުގައެވެ.
ރައީސްގެ ވާހަކަފުޅުގައި، ރާއްޖެއަށް ކުރިމަތިވެފައިވާ ތަފާތު ގޮންޖެހުންތަކަށް ބަލާއިރު، ރާއްޖޭގެ އިނޮވޭޝަންގެ "ޓްރާންސްފޯމަޓިވް ޕަވާ"ގެ ހެކި ފެންނަ ކަމަށް އެމަނިކުފާނު ފާހަގަކުރެއްވިއެވެ. ޑިޖިޓަލައިޒޭޝަންގެ ސަބަބުން ރާއްޖޭގެ މުސްތަގުބަލު ބައްޓަން ކުރަމުންދާ ގޮތް ރާއްޖެއިން ދައްކަމުންދާ ކަމަށާއި، މިހާރުވެސް ގައުމުގެ މަދު ވަސީލަތްތައް ބެލެހެއްޓުމަށާއި އާންމު ހިދުމަތް ފޯރުކޮށްދިނުން އިތުރުކުރުމަށް ބޭނުން ކުރަމުންދާކަން އެއީ އިޝާރާތެއް ކަމަށް ރައީސް ވިދާޅުވިއެވެ.
ރައީސް މުއިއްޒު އިތުރަށް ވިދާޅުވީ ޑިޖިޓަލައިޒޭޝަން އަށް ބަލައިގަތުމަކީ ހަމައެކަނި އިގްތިސާދީ ކުރިމަގު އިތުރުކުރުމަށް ނޫން ކަމަށާއި، ރާއްޖޭގެ ރައްޔިތުންގެ ދިރިއުޅުމުގެ ފެންވަރު މަތިކުރުމަށް ވެސް ކުރި ކަމެއް ކަމަށެވެ. އަދި ޑިޖިޓަލައިޒޭޝަންގެ ފޯކަސްއަކީ ޑިޖިޓަލް ލިޓްރޭސީން ރައްޔިތުން ބާރުވެރިކުރުވުމާއި، ޓެކްނޮލޮޖީގެ ބޭނުން ހިފައިގެން އުފެއްދުންތެރިންނާއި އިނޮވޭޓަރުން ނެރެވޭނެ ގޮތް ހެދުންކަމަށް އެމަނިކުފާނު ފާހަގަކުރެއްވިއެވެ.
ރައީސް އިތުރަށް ވިދާޅުވީ "ޑިޖިޓަލް މޯލްޑިވްސް ޕްރޮގްރާމް" ފަދަ އިސްނެގުމެއްގެ ތެރެއިން ޒުވާނުންނަށް ޑިޖިޓަލް އިގްތިސާދުގައި ކާމިޔާބު ހޯދުމަށް ބޭނުންވާ ހުނަރުތައް ފޯރުކޮށްދެމުންދާ ކަމަށާއި، ހަމަހަމަ ގޮތެއްގައި އަންހެނުންނަށްވެސް މި ފުރުސަތުތައް ލިބޭނެ ގޮތް ކަށަވަރު ކުރަމުންދާ ކަމަށެވެ.
މޫސުމީ ބަދަލުތަކާ ކުރިމަތިލުމަށް ވެސް ޓެކްނޮލަޖީއަކީ މުހިންމު ވަސީލަތެއްކަން ރައީސް ފާހަގަކުރެއްވިއެވެ. އެގޮތުން ކުރިއާލައި އިންޒާރުދޭނެ ސިސްޓަމާއި ސްމާޓް ޓެކޮނަލަޖީން މޫސުމީ ބަދަލުތަކާ ކުރިމަތިލުމަށް ފަސޭހަވެގެންދާ ކަމަށާއި، އެ ވަސީލަތްތަކުގެ އެހީގައި ފާގަތި މުޖްތަމައެއް ބިނާކުރެވިގެންދާނެ ކަމަށް ވެސް ވިދާޅުވިއެވެ.
ރާއްޖެއަކީ ކުޑަ ޖަޒީރާ ގައުމެއްކަން ފާހަގަކުރައްވަމުން، ޓެކްނޮލަޖީގެ ސަބަބުން ރާއްޖެއަށް ގިނަ ގުނަ ކުރިއެރުންތަކެއް ލިބި ދިވެހިންގެ ދިރިއުޅުމަށް ވެސް ގިނަ ބަދަލުތަކެއް އައިސްފައިވާ ކަމަށް ރައީސް ވިދާޅުވިއެވެ.
"ސަމިޓް އޮފް ދަ ފިއުޗާ" އަކީ މީހުންގެ ދިރިއުޅުމަށާއި މުސްތަގުބަލަށާއި އަންނަން އޮތް ޖީލުތަކަށް އަސަރުކުރާ ނާޒުކު އެކި ކަންތައްތަކާ ގުޅޭ ގޮތުން ދުނިޔޭގެ ލީޑަރުން އެއްތަންވެ، އަޑުއުފުލުމަށް މި މަހު ބާއްވާ އދ. ގެ ހައި ލެވަލް އިވެންޓެކެވެ.
