ޓެލެގްރާމުގައި ގިނަ އަދަދެއްގެ ޗެނަލް ހަދައި، ރާއްޖެއާއި ރާއްޖެއިން ބޭރުގެ އެކި މީހުންގެ ބަރަހަނާ މަންޒަރު ދައްކުވައިދޭ ފޮޓޯއާއި ވީޑިއޯ އަޕްލޯޑްކޮށް، ވިޔަފާރީގެ އުސޫލުން މާލީ މަންފާ ހޯދަމުންގެންދިޔަ މައްސަލައަކާ ގުޅިގެން ފުލުހުންގެ ސައިބަރ ކްރައިމް ސެންޓަރުން ޚާއްޞަ އޮޕަރޭޝަނެއް ހިންގައިފިއެވެ.
މި މައްސަލައިގައި އދ. މަހިބަދޫ، ބަހާރުގެ، ޒުބައިރު ޢަލީ (45އ)، ކ. މާލެ، ދަފްތަރު ނަންބަރު ރސ14751 ނާޞިފް ޢަލީ (46އ) އަދި ކ. ކާށިދޫ، ސިލިންކޯ، އިސްމާޢީލް ޒަބީޙް (29އ) ހައްޔަރުކޮށްފައިވެއެވެ. މި ތިން މީހުންގެ ބަންދާމެދު ގޮތެއް ނިންމުމަށް އެކި ދުވަސްމަތިން ކޯޓަށް ހާޒިރުކުރުމުން، އެމީހުން ބަންދުގައި ބޭތިއްބުމަށް ކޯޓުން އަމުރުކޮށްފައިވެއެވެ.
ފުލުހުން ބުނެފައިވާ ގޮތުގައި، މި ތިން މީހުން ހައްޔަރުކުރުމާއެކު މައްސަލައާ ގުޅުންހުރި 14 ޑިޖިޓަލް އިލެކްޓްރޯނިކް އާލާތް ބަލައި ފާސްކޮށްފައިވެއެވެ. އަދި މި ތިން މީހުންގެ ނަމުގައި ހަދާފައިވާ 9 ޓެލެގްރާމް އެކައުންޓު ފުލުހުންގެ ބާރުގެ ދަށަށް ގެނެސް ހިފަހައްޓާފައިވެއެވެ.
މީގެ އިތުރުން، ބަރަހަނާ މަންޒަރު ދައްކުވައިދޭ ފޮޓޯއާއި ވީޑިއޯ ހިމެނޭ 571 ޗެނަލް ވެސް ފުލުހުންގެ ބާރުގެ ދަށަށް ގެނެސް ހިފަހައްޓާފައިވެއެވެ. ފުލުހުންގެ މަޢުލޫމާތު ދޭގޮތުގައި، މި ޗެނަލްތަކުގައި ރާއްޖޭގެ އަންހެނުންގެ ބަރަހަނާ މަންޒަރު ދައްކުވައިދޭ 241,651 ފޮޓޯއާއި 86,618 ވީޑިއޯ (18 އަހަރުން ދަށުގެ ކުޑަކުދިންގެ ފޮޓޯއާއި ވީޑިއޯ ހިމެނޭހެން) އަޕްލޯޑްކޮށްފައިވާކަން ތަޙުޤީޤަށް ފާހަގަކުރެވިފައިވެއެވެ.
ކުޑަކުދިންގެ އޮރިޔާން މަންޒަރު ދައްކުވައިދޭ ފޮޓޯއާއި ވީޑިއޯ ޕޯސްޓުކުރުމަށް 43 ޗެނަލް ހިންގާފައިވާކަން ވެސް ތަޙުޤީޤަށް އެނގިފައިވެއެވެ. މި ޗެނަލްތަކަށް ވަދެ ފައިސާ ދައްކައިގެން 34,680 މީހުން ސަބްސްކްރައިބްކޮށްފައިވާ ކަމާއި، މި މައްސަލައިގައި ތުހުމަތުކުރެވޭ ފަރާތްތަކުން ސަބްސްކްރިޕްޝަން ފީގެ ގޮތުގައި 2 މިލިއަނެއްހާ ރުފިޔާ ނަހަމަ ގޮތުގައި ހޯދާފައިވާކަން ވެސް ތަޙުޤީޤަށް އެނގިފައިވެއެވެ.
ފުލުހުން ވަނީ މީސްމީޑިއާގައި ފޮޓޯއާއި ވީޑިއޯ ލީކުކޮށް އަދި ބްލެކްމެއިލްގެ ޝިކާރައަށް ވެފައިވާ ފަރާތްތަކުން ސައިބަރ ކްރައިމް ސެންޓަރުގެ ނަންބަރު 9136262 އަށް މަޢުލޫމާތު ހިއްސާކޮށްދިނުމަށް އެދިފައެވެ. އަދި މިފަދަ ނޭދެވޭ ޢަމަލުތަކުގެ ޝިކާރައަކަށް ވިޔަ ނުދިނުމަށްޓަކައި، ޢަމަލުތައް އިޞްލާޙުކޮށް ވިސްނުންތެރިކަމާއެކު ޒިންމާދާރު މީހަކަށްވުމަށް ދިވެހި ފުލުހުންގެ ޚިދުމަތުން އިލްތިމާސްކޮށްފައިވެއެވެ.
