ގަވާއިދާ ޚިލާފުވުމުގެ ސަބަބުން ފުލުހުންގެ ބެލުމުގެ ދަށަށް ގެންގޮސް ޓޯކޮށްފައިވާ 500 އުޅަނދެއް ނައްތާލާފައިވާ ކަމަށް ފުލުހުން ބުނެފިއެވެ.
ފުލުހުން މަޢުލޫމާތު ދިންގޮތުގައި ނައްތާލާފައިވަނީ ދެ ފުރޮޅުލީ 247 އުޅަނދާއި، ހަތަރު ފުރޮޅުލީ 29 އުޅަނދާއި 223 ބައިސްކަލާއި އެމްބިއުލާންސެކެވެ. މި އުޅަނދުތައް ނައްތާލާފައިވަނީ މި މަހުގެ ހަވަނަ ދުވަހު ކަމަށް ފުލުހުން ހާމަކޮށްފައިވެއެވެ.
މީގެ އިތުރުން، މާލޭގައި ހުންނަ މޭރީބްރައުން ކައިރީގައިވާ ޓޯޔާޑުގައި ޓްރަކެއްގެ ތެރެއިން މި އުޅަނދުތަކުގެ ތެރެއިން ބައެއް ވައްޓާލާ މަންޒަރު ދައްކުވައިދޭ ވީޑިއޯއެއް މިއަދު އާންމުވެފައިވެއެވެ. މި ވީޑިއޯ މީސް މީޑިޔާގައި ދައުރުވާން ފެށުމާ ގުޅިގެން ފުލުހުން ވަނީ އެއީ ގަވާއިދާ ޚިލާފުވެގެން ނައްތާލުމަށް ގެންދިޔަ ވެހިކަލްތަކެއް ކަމަށް ކަށަވަރުކޮށްދީފައެވެ.
މި މައްސަލައާ ގުޅިގެން ފުލުހުން ވަނީ ދައުލަތުގެ މުއައްސަސާތަކަށް ރައްޔިތުން ކުރާ އިތުބާރާއި މުޖުތަމަޢުގެ އެއްބައިވަންތަކަން ގެއްލޭފަދަ، ޙަޤީޤަތާ ޚިލާފު ވާހަކަތައް ނުފެތުރުމަށް އިލްތިމާސްކޮށްފައެވެ.
