ޑޮލަރު ވިއްކުމުގެ ސްކޭމްތަކެއް ހިންގަމުން ދާތީ ސަމާލުވުމަށް ފުލުހުން އިލްތިމާސް ކޮށްފިއެވެ.
މިކަމާ ގުޅިގެން ފުލުހުން ބުނީެފައިވަނީ ޑޮލަރު ވިއްކާ ކަމަށް ބުނެ ސޯޝަލް މީޑިއާގެ ވަސީލަތްތައް މެދުވެރިކޮށް މަކަރާއި ހީލަތުން ފައިސާ އަތުލުމުގެ އަމަލުތައް އިތުރުވަމުންދާކަން ފާހަގަ ކުރެވިފައިވާ ކަމަށާއި ބޭރު ފައިސާ ގަނެވިއްކުމުގެ މުއާމަލާތްކުރުމުގައި އިތުބާރުހުރި ގާނޫނީ ގޮތުން ހުއްދަ ލިބިފައިވާ ފަރާތްތަކާއި މުއާމަލާތްކުރުމަކީ މިފަދަ ސްކޭމްތަކުން ސަލާމަތްކުރުމަށް އެޅޭނެ މުހިންމު ފިޔަވަޅެއް ކަމަށެވެ.
ކަޅުބާޒާރުގައި އެކި ޕްލެޓްފޯމްތަކުގައި ޑޮލަރު ވިއްކާ ހަދާއިރު އޭގެ ތެރޭގައި ޓެލެގްރާމް، ފޭސްބުކް، ވައިބާ ފަދަ ކޮމިއުނިޓީތައް ހިމެނެއެވެ. އަދި މިފަދަ ސްކޭމް ތަކުގައި ބޮޑެތި އަދަދުން ރުފިޔާ ނެގުމަށްފަހު ޑޮލަރު ނުދިނުމާއި ފޭކް ޑޮލަރު ދިނުން ފަދަ ކަންކަން ވެއެވެ.
ސްކޭމްގެ މައްސަލަތައް އިންތިހާއަށް އިތުރުވެފައިވާއިރު މި ފަހުން ސްޓެލްކޯގެ ނަމުގައި ފޭކް ކޯލްތަކެއް އެކުންފުނީގެ ކަސްޓަމަރުންނަށް ލިބެމުންދާކަން ފާހަގަވެފައިވާކަމުގައި އެކުންފުނިން ހާމަކޮށްފައިވެއެވެ. މި މައްސަލައިގައި އެ ކުންފުނީގެ މެނޭޖިން ޑިރެކްޓަރު ވިދާޅުވީ ސްޓެލްކޯއިން އެއްވެސް ކަސްޓަމަރަކަށް ފޯނުން ގުޅައި، ޒާތީ މަޢުލޫމާތާއި ބޭންކް އެކައުންޓް އަދި ކާޑުގެ މަޢުލޫމާތު ނުހޯދާނެކަމަށެވެ.
ރާއްޖޭގައި އެކި ފަރާތްތަކުގެ ނަމުގައި ސްކޭމް ކޯލްތައް ކޮށް، އެކި ފަރާތްތަކުގެ ބެންކް އެކައުންޓްތަކުން ފައިސާ ފޭރުމުގެ ޢަމަލުތައް ވަނީ ގިނަވެފައެވެ. ސްކޭމްތަކުގެ މައްސަލާގައި ސަރުކާރުން މިހާރު ވަނީ އެންޓި ސްކޭމް ސެންޓަރެއްވެސް އުފައްދާފައެވެ.
އޭގެ އިތުރުން މިދިޔަ ހަފްތާތެރޭގައި ކަޅު ބާޒާރުގައި ޑޮލަރު ވިއްކުމުގެ ވިޔަފާރި ކުރަމުންދިޔަ 5 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފައިވެއެވެ.
