ގަވާއިދާ ޚިލާފަށް ވެހިކަލް ދުއްވާ މީހުންގެ ލައިސަންސުން ޕޮއިންޓް ކަނޑަން ފަށާނެކަން ރައީސް ޑރ. މުހައްމަދު މުއިއްޒު މިރޭ އިޢުލާންކުރައްވައިފިއެވެ. އަދި ރައީސް ވަނީ ގަވާއިދާ ޚިލާފަށް ބާރު ސްޕީޑުގައި ދުއްވާ އުޅަނދުތައް ކޮންޓްރޯލްކުރުމަށާއި، އުޅަނދަށް ބަދަލުގެނެސްގެން ނުވަތަ އުޅަނދުގެ ބާވަތުން ދުއްވާއިރު އަޑުގަދަ އުޅަނދުތައް ބޭނުންކުރުން ކޮންޓްރޯލްކޮށް، އާންމު ރައްޔިތުން ދިރިއުޅޭ ސަރަހައްދުތައް ރައްކާތެރިކުރުމަށްޓަކައި ފިޔަވަޅުތަކެއް އެޅުމަށް ކަމާބެހޭ ފަރާތްތަކަށް އަންގަވާފައެވެ.
މި ފިޔަވަޅުތައް އެޅުމަށް ރައީސް އެންގެވީ ރޭ ހުޅުމާލޭ ސެންޓްރަލް ޕާކު ސަރަހައްދުގައި ހިނގި ނުރައްކާތެރި އެކްސިޑެންޓެއްގައި ޒުވާނަކު ނިޔާވުމާ ގުޅިގެންނެވެ. މި އެކްސިޑެންޓަކީ ބާރު ސްޕީޑުގައި ދުއްވާފައިދިޔަ ސްޕޯޓްސް ކާރެއް ކޮންޓްރޯލް ނުވެ ސައިކަލެއްގައި ޖެހި ހިނގި ހާދިސާއެކެވެ.
ރައީސް އިޢުލާންކުރެއްވި ފިޔަވަޅުތަކުގެ ތެރޭގައި ގްރެޖުއޭޓިންގ ލައިސަންސް ސިސްޓަމެއް ތަޢާރަފުކުރުމާއި ގަވާއިދާ ޚިލާފަށް ވެހިކަލް ދުއްވާ ފަރާތްތަކުގެ ލައިސަންސުން ޕޮއިންޓް ކަނޑަން ފެށުން ހިމެނެއެވެ. މީގެ ކުރިންވެސް ބާރު ސްޕީޑުގައި ދުއްވާ އުޅަނދުތަކުގެ ސަބަބުން ނުރައްކާތެރި އެކްސިޑެންޓްތަކުގައި އެތައް ބައެއްގެ ފުރާނަ ގެއްލިފައިވާކަން ފާހަގަކުރެވެއެވެ.
