ރާއްޖޭގެ އެކި ހިސާބުތަކުގައި ބާރު ސްޕީޑުގައި އެއްގަމު އުޅަނދުތައް ދުއްވުމުގެ ސަބަބުން ހިނގަމުންދާ ނުރައްކާތެރި އަދި ހިތާމަވެރި ހާދިސާތައް ހިނގައިގެންދިޔަ ނުދިމުގެ ގޮތުން، ބާރު ސްޕީޑުގައި ދުއްވާ ފަރާތްތަކާމެދު ހަރުކަށި ފިޔަވަޅު އެޅުމަށް ދައުލަތުގެ އިދާރާތަކަށް ރައީސް އަންގަވައިފިއެވެ.
ނުރައްކާތެރިކޮށް ދުއްވުމުގެ ސަބަބުން ވި އެކްސިޑެންޓެއްގައި ރޭ މެންދަމުވަނީ ވަރަށް ހިތާމަވެރި ޙާދިސާއެއް ހިނގާ އަނެއްކާވެސް މީހެއްގެ ފުރާނަ ގެއްލިފައިވާކަން ފާހަގަ ކުރައްވާ ރައީސް ކުރެއްވި އެކްސް ޕޯސްޓެއްގައި ވިދާޅުވީ، ރާއްޖޭގެ އެއްވެސް ރަށެއްގައި، އެއްވެސް ވަގުތަކު ބާރު ސްޕީޑުގައި ވެހިކަލް ދުއްވާ ފަރާތްތަކާމެދު ހަރުކަށި ފިޔަވަޅުތައް އެޅުމަށް ޤާނޫނުތަކާއި ގަވާއިދުތަކަށް ގެންނަންޖެހޭ ބަދަލުތައް ގެނެސް، އެކަންކަން ތަންފީޒުކުރަން ފަށަން ސަރުކާރުގެ ކަމާގުޅުންހުރި އިދާރާތަކަށް މިހާރު އަންގާފައި ވާކަމުގައެވެ.
ރޭގައި ހިތާމަވެރި ގޮތެއްގައި މި ދުނިޔެ ދޫކުރި 23 އަހަރުގެ ޒުވާން ޙަސަން ސަމާޙުގެ ފުރާނައަށް ސުވަރުގޭގެ ދާއިމީ ނިޢުމަތް މިންވަރު ކުރައްވަވާ، ޢާއިލާއަށް ކެތްތެރިކަން ދެއްވަވާށި! އާމީން. މިފަދަ ހިތާމަވެރި ޙާދިސާތައް ހިނގުން ހުއްޓުވުމަކީ އެކަމުގައި ހުރިހާ ފަރާތްތަކެއްގެވެސް އެއްބާރުލެއްވުން ބޭނުންވާ ކަމެއް.
ރައީސް މުއިއްޒުގެ އެކްސް ޕޯސްޓުގައި ވިދާޅުވެފައި ވެއެވެ.
ރައީސް މުއިއްޒު އިތުރަށް ވިދާޅުވީ، ނުރައްކާތެރިކޮށް ބާރު ސްޕީޑުގައި ދުއްވާ ދުއްވުންތައް ހުއްޓުވައި، މާލެއާއި ރާއްޖޭގެ އެހެނިހެން ރަށްރަށުގެ މަގުތަކަކީ އެންމެންނަށްވެސް އަމާންކަމާއެކު ބޭނުންކުރެވޭނެ ތަންތަންކަމުގައި ހެދުމަށްޓަކާ ސަރުކާރުން ކުރަންޖެހޭ އެންމެހާ ކަންކަން މިސަރުކާރުން ކުރާނެކަމުގެ ޔަޤީންކަން ހުރިހާ ރައްޔިތުންނަށް އަރުވާ ކަމުގައެވެ.
ހުޅުމާލޭގައި ރޭ ދަންވަރު ހިނގި ނުރައްކާތެރި އެކްސިޑެންޓުގައި ނިޔާވި ލ. އިސްދޫ، ބީޗްހައުސް، ހަސަން ސަމާހުގެ ޖަނާޒާ މިރޭ މަޣްރިބް ނަމާދަށްފަހު އާ ސަހަރާ މިސްކިތުގައި ބޭއްވުމަށް ވަނީ ހަމަޖެހިފައެވެ. އުމުރުން 23 އަހަރުގެ ސަމާހުގެ އާއިލާއިން ވަނީ މި ޖަނާޒާގައި ވީހާވެސް ގިނަ ބަޔަކު ބައިވެރިވުމަށް އެދިފައެވެ.
ސަމާހަކީ މޯލްޑިވްސް ކަރެކްޝަނަލް ސަރވިސްގެ ޕްރިޒަން ލާންސް ކޯޕްރަލެކެވެ. އޭނާ މާފުށި ޖަލުގެ އިމަޖެންސީ ސަޕޯޓް ގްރޫޕުގައި މަސައްކަތްކުރަމުން އައި އިރު، ކަރެކްޝަންގައި ވަޒީފާ އަދާކުރާތާ ތިން އަހަރު ވެފައިވެއެވެ.
އެކްސިޑެންޓް ހިނގިއިރު ސަމާހު އިނީ ސައިކަލް ދުއްވަމުންނެވެ. އޭނާގެ ސައިކަލުގެ ފަހަތުގައި އިން ޒުވާނަކަށްވެސް މި އެކްސިޑެންޓުގައި އަނިޔާވެ، މިވަގުތު ހޮސްޕިޓަލުގައި ފަރުވާދެމުން ގެންދެއެވެ.
ސަމާހު ނިޔާވީ އެކްސިޑެންޓް ވުމާ ގުޅިގެން ހުޅުމާލެ ހޮސްޕިޓަލަށް ގެންގޮސް ފަރުވާދޭން ފެށިތާ ކުޑަ ވަގުތުކޮޅެއްގެ ތެރޭގައެވެ. މި ހާދިސާއާ ގުޅިގެން އެކްސިޑެންޓުގައި ހިމެނޭ ކާރު ދުއްވަން އިން 26 އަހަރުގެ ޒުވާނަކު ވަނީ ހައްޔަރުކޮށްފައެވެ.
