ބިދޭސީން އުޅެނީ ގަވާއިދުގެ ތެރެއިންތޯ ބަލާލެވޭ އެޕްލިކޭޝަނެއް ތައާރަފުކުރުމުގެ މަސައްކަތް ފަށާފައިވާ ކަމަށް ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަޙީދު ހާމަކުރައްވައިފިއެވެ. ޝަމްއާން މިކަން ހާމަކުރެއްވީ ދައުލަތުގެ މީޑިއާ ޕީއެސްއެމްއަށް ދެއްވި އިންޓަވިއުއެއްގައެވެ.
އިމިގްރޭޝަންގެ އޮފިސަރުންނަށް ބިދޭސީން ގަވާއިދުގެ ތެރެއިން އުޅޭތޯ ބެލޭނެ މި އެޕްލިކޭޝަނާ ބެހޭގޮތުން ވާހަކަދައްކަވަމުން، ޝަމްއާން ވިދާޅުވީ މީގެކުރިން އިމިގްރޭޝަންގެ މަސައްކަތްތައް ކުރެވެމުންދިޔައީ މެނުއަލްކޮށް ކަމަށެވެ. ނަމަވެސް މިހާރު އެކަން ބަދަލުކޮށް، ޒަމާނާ އެއްގޮތަށް މަސައްކަތް ޑިޖިޓަލައިޒްކުރުމުގެ މަސައްކަތް ކުރިއަށްދާ ކަމަށާއި "އިމިގްރޭޝަން ވޮޗް" އަކީވެސް މީގެ ބައެއްކަމަށް އޭނާ ވިދާޅުވިއެވެ.
ގަވާއިދާ ޚިލާފަށް ރާއްޖޭގައި ދިރިއުޅޭ ބިދޭސީން ހޯދުމަށް އިމިގްރޭޝަނުން ހާއްސަ އޮޕަރޭޝަންތަކެއް ދަނީ ހިންގަމުންނެވެ. މި އޮޕަރޭޝަންތަކުގައި ގިނަ އަދަދެއްގެ ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފައިވާއިރު، މިގޮތަށް ހައްޔަރުކުރެވޭ އެއްވެސް ބިދޭސީއަކަށް ދެވަނަ ފުރުސަތެއް ނުދޭނެ ކަމަށްވެސް ބުނެފައިވެއެވެ.
ގަވާއިދާ ޚިލާފަށް އުޅޭ ބިދޭސީންގެ މައްސަލަ ފަސޭހައިން ރިޕޯޓްކުރުމަށް "އިމިގްރޭޝަން ވޮޗް" ގެ އޮންލައިން ޕްލެޓްފޯމެއް މޯލްޑިވްސް އިމިގްރޭޝަނުން ވަނީ 17 ޖުލައިގައި ތަޢާރަފުކޮށްފައެވެ.
ސަރުކާރުގެ އަމާޒަކީ ގަވާއިދާ ޚިލާފަށް އުޅޭ ބިދޭސީން ހޯދުމަށް ހިންގާ އޮޕަރޭޝަން ކުރިއަށް އޮތް އަހަރެއްހާ ދުވަހުގެ ތެރޭގައި ރާއްޖޭގެ ހުރިހާ ރަށަކަށް ފުޅާކުރުމާއި، ރާއްޖޭގައި ތިބި ހުރިހާ ބިދޭސީންގެ މަޢުލޫމާތު އެއް ޑޭޓާބޭސްއަކަށް ގެނެސް، ބިދޭސީންގެ މައްސަލައަށް 3 އަހަރުތެރޭ ޖުމްލަ ހައްލެއް ގެނައުމެވެ.
ކޮމެންޓު ފޮނުވާ