ހުޅުމާލޭގައި ކާރަކާއި ސައިކަލެއް ޖެހި ޒުވާނަކު މަރުވި އެކްސިޑެންޓުގައި ކާރު ދުއްވަން އިން މީހާ ހައްޔަރުކޮށްފިއެވެ. ފުލުހުން މަޢުލޫމާތު ދީފައިވާ ގޮތުގައި، ހުޅުމާލެ ސެންޓްރަލް ޕާކް ކައިރިން ބާރު ސްޕީޑެއްގައި ދުއްވާފައި ދިޔަ ކާރެއްގައި ސައިކަލަކުން ޖެހުނު ކަމުގެ ރިޕޯޓް ލިބުނީ ރޭ ދަންވަރު 2:48 ހާއިރުއެވެ.
ފުލުހުން އިތުރަށް ހާމަކުރި ގޮތުގައި މި އެކްސިޑެންޓުގައި ހިމެނޭ ކާރު ދުއްވަން އިން މީހާ ވަނީ ހައްޔަރު ކޮށްފައެވެ. އޭނާއަކީ 26 އަހަރުގެ ދިވެހި ފިރިހެނެކެވެ. އަދި އޭނާ އަތުގައި ލައިސަންސް ނެތްކަން ވެސް އެނގިފައިވެއެވެ.
އެކްސިޑެންޓްގައި ސައިކަލު ދުއްވަން އިން މީހާ ހުޅުމާލެ ހޮސްޕިޓަލްގައި ފަރުވާދެމުން ދަނިކޮށް މަރުވެފައިވާ ކަމަށް ފުލުހުން މަޢުލޫމާތު ދީފައިވެއެވެ. މަރުވި މީހާއަކީ ލ. އިސްދޫއަށް ނިސްބަތްވާ، ހަސަން ސަމާހްއެވެ. އޭނާއަކީ ކަރެކްޝަންސްގެ އޮފިސަރެއްކަން އެނގިފައިވެއެވެ.
މި އެކްސިޑެންޓުގައި ސައިކަލުގެ ފަހަތުގައި އިން މީހާއަށްވެސް ވަނީ ބޮޑެތި އަނިޔާތަކެއްވެފައެވެ. އޭނާގެ މޫނު މަށަވައިގެން ގޮސް ބޮލަށްވެސް ވަނީ އަނިޔާ ލިބިފައިވާ ކަމަށް މަޢުލޫމާތު ލިބިފައިވެއެވެ.
އެކްސިޑެންޓް ހިނގި ސަރަހައްދު ކޯޑައުންކޮށް ފުލުހުން އަންނަނީ ހަރަކާތްތެރިވަމުންނެވެ. އަދި ފުލުހުން މި މައްސަލަ އިތުރަށް ތަޙްޤީޤު ކުރަމުންދާ ކަމަށް ވެސް މަޢުލޫމާތު ދީފައިވެއެވެ.
