ކަޅުބާޒާރުގައި ޑޮލަރުގެ ވިޔަފާރި ކުރަމުންދިޔަ 5 ބިދޭސީއަކު މިއަދު ހައްޔަރުކޮށްފިއެވެ. އިމިގްރޭޝަނުން ހާމަކޮށްފައިވާ ގޮތުގައި، މިމީހުން ހައްޔަރު ކޮށްފައިވަނީ އެ އިދާރާގެ ޓާސްކު ފޯސްއަށް ލިބުނު މަޢުލޫމާތެއްގެ އަލީގައި އިމިގްރޭޝަނާއި ފުލުހުން ގުޅިގެން ކުރިޔަށް ގެންދިޔަ ހާއްސަ ރެއިޑެއްގައެވެ.
މި ރެއިޑުގައި ގަވާއިދާ ޚިލާފަށް، ފުޅާ ދާއިރާއެއްގައި ކަޅުބާޒާރުގައި ޑޮލަރުގެ ވިޔަފާރި ކުރަމުންދިޔަ 5 ބިދޭސީން ވަނީ އިމިގްރޭޝަންގެ ބެލުމުގެ ދަށަށް ގެނެވިފައެވެ. މި މީހުންގެ އަތުން އެތައް ލައްކަ ރުފިޔާއެއްގެ ފައިސާއާއި ގިނަ އަދަދެއްގެ ޑެބިޓް އަދި ކްރެޑިޓް ކާޑުތައް ފެނިފައިވާ ކަމަށް އިމިގްރޭޝަނުން ބުނެފައިވެއެވެ.
އިމިގްރޭޝަނުން އިތުރަށް މަޢުލޫމާތު ދެމުން ބުނެފައިވަނީ މި މައްސަލައާ ގުޅިގެން މިހާރު އިތުރު ތަޙުޤީޤުތައް ކުރިއަށްދާ ކަމަށެވެ. އަދި މި މައްސަލައާ ގުޅޭ އިތުރު ތަފްސީލުތައް ފަހުން ހިއްސާކުރާނެ ކަމަށްވެސް ވިދާޅުވެފައިވެއެވެ.
ފާއިތުވި މަސްތަކުގައި ރާއްޖޭގައި ޑޮލަރުގެ އަގު މައްޗަށް ގޮސްފައިވުމާއެކު، ކަޅުބާޒާރުގައި ޑޮލަރު ވިއްކުމުގެ މައްސަލަތައް އިތުރުވެފައިވާކަން ފާހަގަކުރެވެއެވެ. މި ކަމާ ގުޅިގެން ސަރުކާރުން ވަނީ ޚާއްސަ ފިޔަވަޅުތަކެއް އަޅަން ފަށާފައެވެ.
