މާލޭގެ ވިޔަފާރި ބަނދަރުން އެއް ދުވަސް ތެރޭ 934 ޓީއީޔޫ (ކޮންޓެއިނަރު) ހޭންޑްލްކޮށް، މޯލްޑިވްސް ޕޯޓްސް ލިމިޓެޑް (އެމްޕީއެލް) އިން އައު ރެކޯޑެއް ގާއިމްކޮށްފިއެވެ.
އެމްޕީއެލްއިން މިއަދު ހާމަކުރި ގޮތުގައި، އިއްޔެ މާލޭ ވިޔަފާރި ބަނދަރުގައި އުފެއްދުންތެރިކަމުގެ މި އައު ރެކޯޑު ގާއިމުކުރެވުނުއިރު ބޮޑެތި ތޮއްޖެހުންތަކާއި ގޮންޖެހުންތަކާ ކުރިމަތިލާންޖެހުނު ނަމަވެސްކަމަށް ބުނެފައިވެއެވެ. މި ކާމިޔާބީއަށްޓަކައި އެމްޕީއެލްގެ މުޅި ޓީމާއި ހުރިހާ ޕޯޓް ބޭނުންކުރާ ފަރާތްތަކުގެ ބުރަ މަސައްކަތަށް ޝުކުރު އަދާކޮށްފައިވެއެވެ.
ދާދި ފަހުން، ރެކޯޑު އަދަދެއްގެ ކޮންޓެއިނަރު ހިފައިގެން އައި ބޮޑު ބޯޓެއް މާލޭ ވިޔަފާރި ބަނދަރަށް އައިސްފައިވެއެވެ. މިއީ އެއްފަހަރާ އެންމެ ގިނަ ކޮންޓެއިނަރު ބަރުކޮށްގެން މާލޭ ވިޔަފާރި ބަނދަރަށް މިހާތަނަށް އައި ބޯޓުކަމަށްވާއިރު، މި ބޯޓުގައި ޖުމްލަ 1836 ޓީއީޔޫ ހިމެނެއެވެ.
މާލޭގެ ވިޔަފާރި ބަނދަރުގައި ދިމާވެފައިވާ މައްސަލަތައް ހައްލުކުރުމަށް އެމްޕީއެލްއިން ގިނަ މަސައްކަތްތަކެއް ކުރަމުންދެއެވެ. މި އަހަރުގެ ތެރޭގައި، ބަނދަރުގެ ޖާގައިގެ ދަތިކަން ހައްލުކުރުމަށް ޔާޑު ސަރަހައްދުން 250 ކޮންޓެއިނަރު ޖެހޭނެ އިތުރު ޖާގައެއް ހަމަޖައްސާފައިވާއިރު، އިތުރު 100 ކޮންޓެއިނަރު ޖެހޭނެ ޖާގައެއް ހެދުމުގެ މަސައްކަތްވެސް ކުރިއަށްދާކަން ފާހަގަކޮށްލެވެއެވެ.
މީގެއިތުރުން، ސަރަހައްދު ރައްކާތެރިކުރުމާއި، ފަސޭހަކުރުމަށްޓަކައި ޕޭވްކުރުމާއި ގިނަ މަރާމާތުތަކެއްވެސް ކުރިއަށްދާކަމަށް ބުނެފައިވެއެވެ.
އެމްޕީއެލްއިން މަސައްކަތްކުރަމުންދަނީ މުދަލުގެ ވެރިފަރާތްތަކަށް ރައްކާތެރިކަމާއެކު، ވީހާވެސް އަވަސް، ލުއިފަސޭހަ ޚިދުމަތެއް ފޯރުކޮށްދިނުމަށެވެ. އަދި ކައިރި މުސްތަޤުބަލެއްގައި މި ޚިދުމަތް އިތުރަށް ފުޅާކޮށް، މިހާރަށްވުރެ ލުއިފަސޭހަވާނެ ހުރިހާ ކަންތައްތަކަށް މަސައްކަތްކުރަމުންދާކަމަށްވެސް އެމްޕީއެލްއިން ބުނެފައިވެއެވެ.
