މާފަންނު ގެއެއްގެ ފާހަނާ ފެން ލައިޓުން ވަދެ، މޮބައިލް ފޯނާއި ލެޕްޓޮޕެއް ފޭރުނު ދެ މީހަކު ހައްޔަރުކޮށްފިއެވެ.
ފުލުހުން ބުނީ އިއްޔެ ހަވީރު 4:05 ހާއިރު މާލޭގެ ގެއެއްގެ ތެރޭގައި ހުރި މީހެއްގެ އަތުން ވަގަށް ނެގި އިލެކްޓްރޯނިކް ސާމާނުތަކެއް ފެނުނު މައްސަލާގައި ތުހުމަތުވާ ދެ ފިރިހެނުން ހައްޔަރުކޮށްފައިވާ ކަމަށެވެ. އެ މައްސަލައިގައި ހައްޔަރު ކުރި ދެ މީހުންނަކީ:
އިސްމާއިލް ވިޝާލް، 30، މ. ދާރުލްގަރާރު
ހުސެއިން ޝާއިފް، 32، ވިދުވަރު/ބ. ދަރަވަންދޫ
ފުލުހުން ބުނީ މި ދެ މީހުން ގެއެއްގެ ފާހަނާ ފެން ލައިޓުން ވަދެ ކޮޓަރީގައި ނިދާފައި ތިބި ދެމީހުންގެ ކަރުގައި ވަޅި ޖައްސައި އެއްވެސް ހަރަކާތެއްކޮށްފި ނަމަ، މަރާލާނެ ކަމަށް ބިރު ދައްކައި އެ ދެ މީހުންގެ މޮބައިލް ފޯނާއި ލެޕްޓޮޕްއަކާ އަދި އެހެނިހެން ތަކެތި ފޭރުނު މައްސަލަ އިއްޔެ ރިޕޯޓުކޮށްފައިވާ ކަމަށެވެ.
ފުލުހުން ބުނި ގޮތުގައި ދެ މީހުން ފިލައިގެން ގޮސްފައިވަނީ ފާހަނާއަށް ވަދެ، އެތެރެއިން ދޮރު ތަޅުލައި ފެން ލައިޓުން ނުކުމެގެންނެވެ.
މި ދެ މީހުން ރޭގެ ވަގުތެއްގައި ހައްޔަރުކޮށް، ފޭރުނު ލެޕްޓޮޕާއި މޮބައިލް ފޯންތައް ވަނީ ހޯދައިފައެވެ. އަދި އެމީހުން ވަގަށް ނަގާފައިވާ ކަމަށް ތުހުމަތު ކުރެވޭ އެހެނިހެން ތަކެތި ވެސް އެމީހުން އަތުން ފެނިފައިވެއެވެ.
މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.
