ރާއްޖެ އަށް ވަރަށް ގިނަ އިން އަންނަ އިންޑިއާގެ މީހަކު މަނީ ލޯންޑަރިންގެ ތުހުމަތުގައި ހައްޔަރުކޮށްފިއެވެ.
ކޯޓު އަމުރެއްގެ ދަށުން ވެލާނާ އިންޓަނޭޝަނަލް އެއާޕޯޓު (ވީއައިއޭ) އިން ހައްޔަރު ކުރީ އިންޑިއާގެ އަބްދުލް ރަގޫބް ނިސްތާރު ހަލީމް ރަހްމާން 27، އެވެ. އެމީހާގެ ބަންދާ މެދުގައި ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން ފަސް ދުވަސް ވަންދެން ބަންދުގައި ބަހައްޓަން ވަނީ އަމުރުކޮށްފައެވެ.
ބަންދު އަމުރުގައިވާ ގޮތުން އިންޑިއާ މީހާ ހައްޔަރު ކުރީ އޭނާގެ އަތުން ގިނަ އަދަދަކަށް ޑޮލަރު ފެނުމުންނާއި އެ ފައިސާ ހޯދި ގޮތް ފުލުހުންނަށް ސާފުކޮށްދީފައި ނުވުމާއި އަދި ރާއްޖެ އެތެރެވެ، ޖެހިގެން އަންނަ ދުވަހު އޭނާ އަބަދުވެސް ފުރައިގެން ދާތީ ޝައްކުކުރެވޭ ކަންތައްތަކެއް ހުރުމުންނެވެ.
މި މީހާގެ ބަންދާ މެދުގައި ގޮތެއް ނިންމުމަށް ކޯޓަށް ހާޒިރުކުރީ 24 ގަޑިއިރު ފަހުން ކަމަށް އޭނާގެ ވަކީލު ބުނި ކަމުގައި ވިޔަސް، ފުލުހުން ބުނެފައި ވަނީ ފުލުހުންގެ ބެލުމުގެ ދަށަށް އޭނާގެ ގެންދިޔަ ވަގުތުން ފެށިގެން 24 ގަޑިއިރުގެ ތެރޭގައި ކޯޓަށް ހާޒިރުކުރި ކަމަށެވެ.
އެމީހާ އަތުން ހިފެހެއްޓި ފައިސާއަކީ ސައްހަ ގޮތުގައި ހިފަހައްޓާފައިވާ ފައިސާ ކަމަށާއި މީނާގެ މައްޗަށް ތުހުމަތުކުރެވޭ މަނީ ލޯންޑާކުރުގެ ތުހުމަތާ ގުޅޭ އެއްވެސް ހެއްކެއް ފުލުހުން ހުށަހަޅާފައި ނުވާކަމަށް އޭނާގެ ވަކީލު ވަނީ ބުނެފައެވެ. ކޯޓު އަމުރުގައި ހިފެހެއްޓީ ކިހާ އަދަދެއްގެ ފައިސާ ކަމެއް ނުބުނެއެވެ.
ފުލުހުން ބުނީ އެ މީހާގެ އަތުން ގިނަ އަދަދެއްގެ ޑޮލަރު ފެނިފައިވާ ކަމަށާއި އެ ޑޮލަރުތަކަކީ ބަޔަކު އޭނާއަށް ހަވާލުކުރި ޑޮލަރުކަން ދޭހަވާ ފަދަ ލިޔުންތަކެއް ކަމަށެވެ. އަދި އެމީހާގެ ނަން ވެސް ޕާސްޕޯޓުން ބަދަލުކޮށްފައިވާ ކަމަށް ފުލުހުން ބުންޏެވެ.
