ޑްރަގް ކޯޓުން ވައްކަން ކުރިކަމުގެ ތުހުމަތުގައި ހައްޔަރުކުރި މީހާގެ ވަނަވަރު ފުލުހުން އާންމުކޮށްފިއެވެ.
މި މައްސަލައިގައި ހައްޔަރު ކުރީ ސ. ހިތަދޫ، ދެކުލައަރާގެ މުހައްމަދު އަސްލަމް 32، އެވެ.
އަސްލަމް ޑްރަގް ކޯޓުން ހައްޔަރުކުރި ކަމަށް ވަނީ މިދިޔަ މަހުގެ 27 ގައެވެ. އަދި ކޯޓު އަމުރެއްގެ ދަށުން އަސްލަމް ހައްޔަރު ކުރީ އޮގަސްޓް 31 ވަނަ ދުވަހުއެވެ.
މި މައްސަލައާ ގުޅިގެން އޭނާގެ ބަންދަށް ގޮތެއް ނިންމަން ކުރިމިނަލް ކޯޓަށް ހާޒިރުކުރުމުން 15 ދުވަހު ބަންދު ކުރުމަށް ކޯޓުން ވަނީ އަމުރުކޮށްފައެވެ.
ބަންދު އަމުރުގައި ބުނެފައި ވަނީ ޑްރަގް ކޯޓުގެ ކުޑަ ދޮރެއް ހަލާކުކޮށްލައިގެން ވަދެ އެތަނުން ވައްކަންކުރި ކަމަށް އަސްލަމް އިއުތިރާފްވެފައިވާ ކަމަށެވެ. އަސްލަމަކީ އެކިއެކި މައްސަލަތަކުގައި ހައްޔަރުކޮށް، ބަންދުގެ ލޮގް އޮތް މީހެއް ކަމަށް ބަންދު އަމުރުގައިވެއެވެ.
ސަރުކާރުގެ އިމާރާތްތަކުން ވައްކަން ކުރުމުގެ ގިނަ ރެކޯޑްތަކެއް ވެސް އަސްލަމްގެ އޮވެއެވެ.
މި މައްސަަލަ ފުލުހުން މިހާރު ގެންދަނީ ތަހުގީގު ކުރަމުންނެވެ.
ކޮމެންޓު ފޮނުވާ