މޯލްޑިވްސް އިންޓަގްރޭޓެޑް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ) އާއި އެގްރޯ ނެޝަނަލް ކޯޕަރޭޝަން (އެގްރޯނެޓް) އުވާލުމަށް ސަރުކާރުން ނިންމައިފިއެވެ. މިއީ ޚަރަދު ކުޑަކުރުމަށް ސަރުކާރުން ނިންމަމުންދާ ނިންމުންތަކުގެ ތެރެއިން އެންމެ ފަހުގެ ނިންމުމެވެ. ސަރުކާރުގެ މާލީ ހާލަތު ރަނގަޅުކުރުމަށް ގިނަ މުހިންމު ނިންމުންތަކެއް ސަރުކާރުން ނިންމަމުން ދެއެވެ. މީގެ ތެރޭގައި ސަރުކާރުގެ ގިނަ ކުންފުނިތަކެއް އެއްކޮށްލުމަށް ނިންމި ނިންމުން ހިމެނެއެވެ.
އެމްއައިޓީޑީސީ އާއި އެގްރޯނެޓް އުވާލުމަށް ނިންމީ މިދިޔަ އާދީއްތަ ދުވަހު ބޭއްވުނު ކެބިނެޓް ބައްދަލުވުމެއްގައެވެ.
ހަމަ މި ބައްދަލުވުމުގައި ރީޖަނަލް އެއަރޕޯޓްސް ކޮމްޕެނީ ލިމިޓެޑް (އާރްއޭސީއެލް) އާއި މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)، ފަހި ދިރިއުޅުން ކޯޕަރޭޝަން (އެފްޑީސީ) އާއި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)، އަދި ބިޒްނަސް ސެންޓަރ ކޯޕަރޭޝަން (ބީސީސީ) އާއި މޯލްޑިވްސް ފަންޑް މެނޭޖްމަންޓް ކޯޕަރޭޝަން (އެމްއެފްއެމްސީ) އެއްކޮށްލުމަށް ވެސް ކެބިނެޓުން ނިންމިއެވެ.
ރައީސް އޮފީހުން ބުނާ ގޮތުގައި ބީސީސީ އާއި އެމްއެފްއެމްސީ އެއްކޮށްލުމަށްފަހު، އެމްއައިޓީޑީސީ އުވާލައި އެ ކުންފުނީގެ މެންޑޭޓް އެމްއެފްއެމްސީ އަށް ބަދަލުކުރެވޭނެއެވެ.
އަދި ދަނޑުވެރިކަމުގެ ދާއިރާ ކުރިއެރުވުމަށް ކުރީގެ ސަރުކާރުން އުފެއްދި ކުންފުންޏެއް ކަމަށްވާ އެގްރޯނެޓްގެ މެންޑޭޓް މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން (އެމްއައިޑީއެފްޒެޑް) އަށް ބަދަލުކުރުމަށް ވަނީ ނިންމާފައެވެ.
ރައީސް އޮފީހުން ބުނާ ގޮތުގައި މި ބަދަލުތައް މި އަހަރު ނިމުމުގެ ކުރިން ގެނައުމަށް ކެބިނެޓުން ނިންމާފައިވެއެވެ.
މިދިޔަ ހަފްތާގައި ކެބިނެޓުން ނިންމީ ދަރަނި އިތުރުވަމުންދާ ދައުލަތުގެ ޔުޓިލިޓީ ކުންފުންޏެއް ކަމަށްވާ ފެނަކަ ކޯޕަރޭޝަން، ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ ސަބްސިޑިއަރީ ކުންފުންޏެއްގެ ގޮތުގައި ހަމަޖެއްސުމަށެވެ.
ގެއްލުމުގައި ހިނގަމުންދާ ސަރުކާރު ކުންފުނިތައް ފައިދާ ލިބޭ ބޮޑެތި ކުންފުނިތަކާ އެއްކޮށްލުމަކީ ދައުލަތުގެ މާލީ ހާލަތު ރަނގަޅުކުރުމަށް ދިވެހި ސަރުކާރުން އިޢުލާނުކޮށްފައިވާ އަރައިގަތުމުގެ ފިޔަވަޅުތަކުގެ ތެރެއިން ބައެކެވެ.
ޚަރަދު ކުޑަކޮށް އާމްދަނީ އިތުރުކުރުމަށް ގިނަ ފިޔަވަޅުތަކެއް އަޅާނެކަން ސަރުކާރުން އިޢުލާނުކޮށްފައިވެއެވެ. މީގެ ތެރޭގައި އާސަންދަ އިސްލާހުކުރުމަށާއި، އަމާޒު ހިފައިގެން ސަބްސިޑީ ދިނުމަށާއި، އަދި ޑޮލަރުން އާމްދަނީ ލިބޭ ކުންފުނިތަކުން ޑޮލަރުން ޓެކްސް ދެއްކުމަށް ޤާނޫނީ އިސްލާހުތައް ގެނައުން ހިމެނެއެވެ.
ރާއްޖޭގެ ބޭރުގެ ދަރަނި އަދާކުރުމުގެ ޒިންމާތައް އިތުރުވަމުން ދިއުމާއެކު، ރާއްޖޭގެ ކްރެޑިޓް ރޭޓިންގ ފިޗްއިން ވަނީ 'CCC+' އިން 'CC' އަށް ދަށްކޮށް، ދަރަނި އަދާނުކުރެވުމުގެ ނުރައްކާ އިތުރުވެފައިވާކަމަށް އިންޒާރުދީފައެވެ.
