ރައީސް މުޙައްމަދު މުޢިއްޒު ލޭނުގެ މަސްވެރިކަމަށް ހުއްދަ ދިނުމާމެދު ކުރިން ނިންމާފައިވާ ނިންމުން ބަދަލުކުރެއްވުމުގައި ފިޝަރީޒް މިނިސްޓަރު އަޙްމަދު ޝިޔާމްގެ ލަފާ ނުހޯއްދަވާ ކަމަށް ދެކެވޭ ވާހަކަތައް ޝިޔާމް ދޮގުކުރައްވައިފިއެވެ.
ޝިޔާމް މިކަން ސާފުކޮށްދެއްވީ ޕީއެންސީން އިއްޔެ ރޭ ބޭއްވި ޖަލްސާއެއްގައި ކުރީގެ ރައީސް ޔާމީން ޢަބްދުލްޤައްޔޫމް ދެއްކެވި ވާހަކަފުޅުތަކާ ގުޅިގެންނެވެ. ރައީސް ޔާމީން ވިދާޅުވެފައިވަނީ ލޭނުގެ މަސްވެރިކަމާ ގުޅޭ ނިންމުން ބަދަލުކުރެއްވުމުގައި ރައީސް މުޢިއްޒު ޝިޔާމްގެ ލަފައެއް ހޯއްދެވުމެއް ނެތި ކަންތައް ނިންމެވި ކަމަށެވެ.
މިކަމާ ގުޅިގެން އެކްސްގައި ޝިޔާމް ވިދާޅުވެފައިވަނީ ރާއްޖޭގެ ވެރިކަން ކުރެއްވި ގިނަ ރައީސުންނާއެކު މަސައްކަތްކުރުމުގެ ތަޖުރިބާ ލިބިވަޑައިގެންފައިވާ ކަމަށެވެ. އޭގެ ތެރެއިން ރައީސް މުޢިއްޒަކީ މަޝްވަރާ ކުރައްވަންޖެހޭ ކަންކަމުގައި، މަޝްވަރާ ކުރައްވަންޖެހޭ ގޮތަށް މަޝްވަރާ ކުރައްވާ ބޭފުޅެއް ކަމަށް ޝިޔާމް ފާހަގަކުރެއްވިއެވެ. އަދި މަޝްވަރާ ކުރަންޖެހޭ ފަރާތްތަކާ އެކަށީގެންވާ މިންވަރަށް މަޝްވަރާ ކުރައްވާތަންވެސް ފެނިވަޑައިގަންނަވާ ކަމަށް މިނިސްޓަރު ވިދާޅުވިއެވެ.
ލޭނުގެ މަސްވެރިކަމަށް ހުއްދަ ނުދެއްވަން ރައީސް މުޢިއްޒު ނިންމެވީ ފާއިތުވި މަހުގެ 29 ވަނަ ދުވަހުއެވެ. މި ނިންމެވުމާ ގުޅިގެން ޝިޔާމް ކުރިން ވިދާޅުވެފައިވަނީ ރައީސް އިސްކަން ދެއްވާފައިވަނީ މަސްވެރިކަމުގެ ސިނާޢަތުގެ މަޞްލަޙަތަށް ކަމުގައެވެ.
