ފޮރިން މިނިސްޓަރު މޫސާ ޒަމީރު، ރަސްމީ ދަތުރެއްގައި ޔުނައިޓެޑް އަރަބް އެމެރިޓޭސް (ޔޫއޭއީ) އަށް މިރޭ ފުރާވަޑައިގެންފިއެވެ.
ފޮރިން މިނިސްޓްރީން ބުނި ގޮތުގައި ޒަމީރު، ޔޫއޭއީ އަށް ކުރައްވާ ދަތުރަކީ މި މަހުގެ 2 އިން 4 އަށް ކުރައްވާ ދަތުރެކެވެ.
ޒަމީރުގެ މި ދަތުރުގައި އެ ގައުމުގެ ބޮޑުވަޒީރު އަދި ހާރިޖީ ވަޒީރު، ޝެއިހް އަބްދުﷲ ބިން ޒައިދު އަލް ނަހްޔާންގެ އިތުރުން ޔޫއޭއީ ސަރުކާރުގެ އެހެނިހެން އިސްވެރިންނާ ބައްދަލު ކުރެއްވުމަށް ވަނީ ހަމަޖެހިފައެވެ.
ޒަމީރުގެ މި ދަތުރަކީ ރާއްޖެ އާއި ޔޫއޭއީ އާ ދެމެދު އޮންނަ ގާތް ރަހްމަތްތެރިކަމުގެ ގުޅުން އިތުރަށް ހަރުދަނާކޮށް ބަދަހި ކުރުމަށް އެޅޭ މުހިންމު ފިޔަވަޅެއް ކަމަށް ފޮރިން މިނިސްޓްރީން ބުނެއެވެ.
މިނިސްޓަރު ޒަމީރުގެ އަރިހުގައި އެމްބެސެޑަރ-އެޓް-ލާޖް، އަޙުމަދު ނަސީރު؛ ސެކްރެޓަރީ، ބައިލެޓަރަލް، ޑރ. ހާލާ ޙަމީދު؛ އަދި ޖޮއިންޓް ސެކްރެޓަރީ، މަރްޔަމް ރީޝާ މި ދަތުރުގައި ބައިވެރިވެވަޑައިގަންނަވައެވެ.
