ދުނިޔޭގެ އެންމެ ބޮޑު އެއް އެއަރލައިން، އެމިރޭޓްސް އިން ރާއްޖެއަށް ދުވާލަކު 4 ދަތުރު ކުރަން ފަށައިފިއެވެ.
އެ އެއަރަލއިންނުން ބުނީ އަންނަ ޖަނަވަރީ މަހުގެ 31 ވަނަ ދުވަހުގެ ނިޔަލަށް ކޮންމެ ދުވަހަކު ރާއްޖެއަށް 4 ފްލައިޓް ބާއްވާނެ ކަމަށެވެ. އަދި މި ބަދަލު ގެނައި ޗުއްޓީ ދުވަސްވަރު ދަތުރުކުރަން ބޭނުންވާ މީހުނަށް އިތުރު ފުރުސަތުތަކެއް ތަނަވަސްކޮށްދިނުމުގެ އިތުރުން ރާއްޖޭގެ ފަތުރުވެރިކަމުގެ ސިނާޢަތް ކޮޅަށްޖެހުމުގައި އެހީތެރިވުމުގެ ގޮތުން ކަމަށް އެ އެއަރލައިނުން ބުނެއެވެ.
އެމިރޭޓްސް އިން ރާއްޖެއަށް އިތުރަށް މި ބާއްވާ ދަތުރުގައި ބޭނުން ކުރަން ހަމަޖެހިފައި ވަނީ ބޮއިން 777-300 ގެ ބޮޑު ފްލައިޓެކެވެ. އެއީ 350 މީހުނަށްވުރެ ގިނައިން އުފުލޭނެ ބޯޓެކެވެ. އެ އެއަރލައިނުން ރާއްޖެއަށް އަންމުކޮށް ކުރާ ޝެޑިއުލް ދަތުރު ތަކުގައި ވެސް ގެންގުޅެނީ އެންމެ ބޮޑެތި ބޯޓު ތަކެވެ.
އެމިރޭޓްސް އަކީ ރާއްޖެއަށް ފަތުރުވެރިން އަނަން 100 ވަރަކަށް މަންޒިލުން ފަތުރުވެރިން އުފުލާދޭ އެއަރލައިނެކެވެ. އޭގެތެރޭގައި ޔޫރަޕުގެ 31 މަންޒިލެއްވެސް ހިމެނެއެވެ.
ކޯވިޑް-19ގެ ސަބަބުން ދަތުރުފަތުރު ހުއްޓުމަކަށް އައުމަށްފަހު އަލުން ފެށިފަހުން ރާއްޖެއަށް މިހާތަނަށް އެންމެ ގިނަ މީހުން އުފުލާފައި ވަނީ އެމިރޭޓްސް އިން ނެވެ. އެއެއަރލައިނުން މިދިޔަ ހޯމަދުވަހުގެ ނިޔަލަށް ރާއްޖެއަށް 39434 ފަތުރުވެރިން ވަނީ އުފުލާފައެވެ.
ދެވަނައަށް އެންމެ ގިނައިން ފަތުރުވެރިން އުފުލާ ގަތަރު އެއަވޭސް އިން ވެސް ރާއްޖެއަށް ކުރާ ދަތުރުތަށް އަންނަނީ އިތުރު ކުރަމުންނެވެ. އެ އެއަރލައިނުން މިހާރު ކޮންމެ ދުވަހަކު ރާއްޖެއަސް 3 ދަތުރު އަޅައެވެ.
