ކުޅުދުއްފުށްޓަށް ދަތުރުކުރި ބޯޓެއްގައި ގަވާއިދާ ޚިލާފަށް އުޅޭ 9 ބިދޭސީން ފެނި، އެ ފަރާތްތަކާމެދު ފިޔަވަޅު އަޅައިފިއެވެ. މިކަން ހާމަވީ ގަވާއިދާ ޚިލާފަށް އުޅޭ ބިދޭސީން މާލެ ދޫކޮށް ރާއްޖޭގެ އެކި ރަށްރަށަށް ދާކަމުގެ މަޢުލޫމާތު ލިބެމުންދިއުމާ ގުޅިގެން އިމިގްރޭޝަންއިން ހިންގި ޚާއްޞަ އޮޕަރޭޝަނެއްގައެވެ.
ކުޅުދުއްފުށީ ސިޓީ ކައުންސިލް، ފުލުހުން އަދި މޯލްޑިވްސް އިމިގްރޭޝަން ގުޅިގެން ކުރިއަށް ގެންދިޔަ މި އޮޕަރޭޝަނުގައި ކުޅުދުއްފުށްޓަށް ދިޔަ ބޯޓެއްގައި ތިބި ބިދޭސީން ވަނީ ބަލައި ފާސްކޮށްފައެވެ. މި ބަލައި ފާސްކުރުމުގައި ގަވާއިދާ ޚިލާފަށް އުޅޭ 9 ބިދޭސީން ފާހަގަކުރެވުނެވެ.
މި 9 ބިދޭސީންނަށް ނޯޓިސް ދީ، އިމިގްރޭޝަނަށް ހާޒިރުވުމަށް އަންގައިފައިވާ ކަމުގައި އިމިގްރޭޝަންއިން ބުނެފައި ވެއެވެ. އަދި މި ބިދޭސީން އިމިގްރޭޝަންއަށް ހާޒިރުވާން ޖެހޭކަމަށް އަންގާ ބޯޓުގެ ކެޕްޓަނަށް ލިޔުމުން ނަސޭހަތްދީފައިވާކަމަށްވެސް އިމިގްރޭޝަންއިން ބުނެފައި ވެއެވެ. އިމިގްރޭޝަންއިން ބުނެފައިވަނީ މި އެންގުމާ އެއްގޮތަށް ޢަމަލުނުކޮށްފިނަމަ އިމިގްރޭޝަން ޤާނޫނުގެ ދަށުން އެ ފަރާތްތަކާމެދު ފިޔަވަޅު އެޅޭނެކަމަށެވެ.
މި ޙާދިސާއާ ގުޅިގެން އިމިގްރޭޝަނުން ވަނީ ގަވާއިދާ ޚިލާފަށް އުޅޭ ބިދޭސީންނާމެދު ހަރުކަށި ފިޔަވަޅު އަޅަމުންދާނެކަމަށް ބުނެފައެވެ. އަދި މިފަދަ ޙާލަތްތަކުގައި ރާއްޖޭގެ އެކި ކަންކޮޅުތަކުގައި ހުރި އިދާރާތަކުން ގުޅިގެން މަސައްކަތްކުރާނެކަމަށްވެސް ބުނެފައިވެއެވެ.
ގަވާއިދާ ޚިލާފަށް އުޅޭ ބިދޭސީންގެ މައްސަލައަކީ ރާއްޖޭގައި އެތައް އަހަރެއް ވަންދެން ދިމާވަމުން އަންނަ މައްސަލައެކެވެ. މިކަމާ ގުޅިގެން ސަރުކާރުން ވަނީ ގިނަ ފިޔަވަޅުތަކެއް އަޅަމުން ގެންދާކަމަށް ބުނެފައެވެ.
