ރެޔާއިދުވާލު ދިވެހި ފުލުހުން ކޮށްދެއްވަމުން ގެންދަވާ ޒިންމާދާރު ޚިދުމަތްތަކަށް ރައީސް މުއިއްޒު ޝުކުރު އަދާކުރައްވައިފިއެވެ.
ފުލުހުންނަށް ރައީސް ޝުކުރު އަދާކުރައްވާފައިވަނީ މިއަދު ފާހަގަ ކުރެވެމުންދާ ދިވެހި ފުލުހުންގެ ޚިދުމަތުގެ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައެވެ.
"ދިވެހި ޤައުމާއި ރައްޔިތުންނަށްޓަކައި، ރެޔާއިދުވާލު ދިވެހި ފުލުހުން ދެއްވާ ޒިންމާދާރު ޚިދުމަތަށް ފަޚުރުވެރިވެ، ޝުކުރު އަދާކުރަމެވެ."، ރައީސްގެ އެކްސް ޕޯސްޓުގައި ވިދާޅުވެފައިވެއެވެ.
ދިވެހި ފުލުހުންގެ ޚިދުމަތުގެ މަދަނީ އިދާރާއަށް މިއަދު ވަނީ 20 އަހަރު ފުރިފައެވެ. މި ޚިދުމަތް ވުޖޫދަށް އައި ތާރީޚަކީ 1 ސެޕްޓެމްބަރު 2004 އެވެ. އޭގެ ކުރިން، 1933 ވަނަ އަހަރުގެ މާރިޗު 29 އިން ފެށިގެން ފުލުހުންގެ ޚިދުމަތް ފޯރުކޮށްދެމުން އައީ ނޭޝަނަލް ސެކިއުރިޓީ ސާވިސްގެ ދަށުންނެވެ.
އޭރުގެ ރައީސުލްޖުމްހޫރިއްޔާ މައުމޫން އަބްދުލްޤައްޔޫމް ވަނީ ފުލުހުންގެ ޚިދުމަތް މަދަނީ ޚިދުމަތަކަށް ބަދަލުކުރެއްވިއެވެ. އަދި މި ޚިދުމަތް ފޯރުކޮށްދޭންޖެހޭނީ ޤާނޫނަކުން ކަމަށް ކަނޑައަޅުއްވައި، 5 އޮގަސްޓު 2008 ގައި އެ ޤާނޫނު ތަސްދީޤުކުރެއްވިއެވެ.
މި 20 އަހަރުގެ ތެރޭގައި ދިވެހި ފުލުހުންގެ ޚިދުމަތުން ވަނީ ގިނަ ކާމިޔާބީތަކެއް ހޯދާފައެވެ. މިހާރު އެ މުއައްސަސާގައި ވަނީ އެންމެ ޒަމާނީ ވަސީލަތްތައް ޤާއިމުކުރެވިފައެވެ. މިކަމުގެ ސަބަބުން ރައްޔިތުންނަށް ޚިދުމަތް ދިނުމުގައި އަވަސްވެ، ތަޙުޤީޤުތައް ކުރުމަށް އިތުރު ފަސޭހަތަކެއް ލިބިގެން ގޮސްފައިވެއެވެ.
