ޒުވާން ޚަޠީބުން ޕްރޮގުރާމަކީ އަދުގެ ޒުވާނުންގެ ކުރިއެރުމަށް މަގުކޮށައިދޭ މުހިއްމު ޕްރޮގުރާމެެއްކަމަށް ޒުވާން ޚަޠީބުން ޕްރޮގުރާމުގެ ބައިވެރިއެއްކަމަށްވާ މުޙައްމަދު ނަޝާއު މުސްޠަފާ ވިދާޅުވެއްޖެއެވެ.
ޒުވާނުް ޚަޠީބުން ތަމްރީންކުރުމުގެ ޕްރޮގުރާމުގެ ދެވަނަ ބެޗު ނިންމާ ސަނަދު ހާސިލްކުރި ޒުވާނުންނަށް ސަނަދު އެރުވުމަށް ބޭއްވެވި ރަސްމިއްޔާތުގައި ޕްރޮގުރާމުގެ ބައިވެރިންގެ ފަރާތުން ވާހަކަދައްކަވަމުން ނަޝާއު ވިދާޅުވީ، މިއަދުގެ ސަރުކާރުން ހާއްސަކޮށް ރައީސް ޑރ. މުޙައްމަދު މުޢިއްޒާއި އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު އިސްލާމީ ވަޙުދަތު ދެމެހެއްޓުމަށްޓަކައި ކުރައްވަމުން ގެންދަވާ މަސައްކަތްޕުޅަށް ޝުކުރު އަދާކުރައްވާކަމަށާއި، ޒުވާން އުމުރުގައި ޚަޠީބަކަށްވެ ހުކުރު ކުރުމަށް ޒުވާނުން ދެކެމުން އައި ހުވަފެން އަސްލަކަށް ހެއްދެވުމަށް މި ޕްރޮގުރާމް ފައްޓަވައިދެއްވީ ވަޒީރަށް ހާއްސަ ޝުކުރެެއް އަދާ ކުރާކަމަށެވެ.
މީގެ އިތުރުން މި ޕްރޮގުރަމަކީ ވަރަށް ފުރިހަމައަށް ފަރުމާކޮށްފައިވާ ޕްރޮގުރާމެއްކަމަށާއި، މި ޕްރޮގުރާމުގެ ހުރިހާ ސެޝަނެއްވެސް ނަންގަވައިދެއްވީ ރާއްޖޭގެ ފުންނާބު އުސް ޢިލްމުވެރިންކަމަށާއި، ޢިލްމުވެރިންގެ ފަރާތުން ގިނަ ދަރުސްތަކާއި ފިލާވަޅުތައް ސެޝަންތަކުން ލިބިގެންދިޔަކަންވެސް ނަޝާއު ފާހަގަކުރިއެވެ.
ޒުވާން ޚަޠީބުން ޕްރޮގުރާމް ނިންމާ މިއަދު 209 ޒުވާނުން ވަނީ ސަނަދު ހާސިލްކުރައްވާފައެވެ.
