މިއަދު ފާހަގަކުރާ ޤައުމީ މާމަ ކާފަ ދުވަހާ ގުޅިގެން ރައީސް މުއިއްޒު ރާއްޖޭގެ އުމުރުން ދުވަސްވީ މީހުންނަށް ތަހުނިޔާ ފޮނުއްވައިފިއެވެ.
ރައީސް ފޮނުއްވި ތަހުނިޔާގެ މެސެޖުގައި، އެމަނުކުފާނު ވިދާޅުވީ ހަރުދަނާ ޒުވާން ޖީލެއް ބިނާކުރުމަށް ކޮންމެ މާމައަކާއި ކާފަޔެއްގެ ނަސޭހަތާއި މަގުދެއްކުން ޤައުމަށް ބޭނުންވާކަމަށެވެ.
މާމަ ކާފަ ދުވަސް ފާހަގަކުރުމުގެ މައިގަނޑު މަޤްޞަދުތަކުގެ ތެރޭގައި އުމުރުން ދުވަސްވީ މީހުންގެ ޚިދުމަތްތަކާއި ތަޖުރިބާ އަންނަން އޮތް ޖީލުތަކަށް ފޯރުކޮށްދިނުމާއި، އެކަމުގެ މުހިންމުކަން ހާމަކޮށްދިނުން ހިމެނެއެވެ. އަދި އޭގެ އިތުރުން މުޖުތަމަޢުގައި އުމުރުން ދުވަސްވީ މީހުންގެ ބައިވެރިވުން އިތުރު ކުރުމަކީވެސް މިފަދަ ދުވަހެއް ފާހަގަ ކުރުމުގެ މުހިއްމު މަގުސަދެކެވެ.
މީގެ އިތުރުން، ޢާއިލާގެ ތެރޭގައި މާމަކާފައިންނާ އޮންނަ ގުޅުން ބަދަހިކޮށް، އެމީހުންނާމެދު އޮންނަ ލޯބި އިތުރުކުރުމާއި، އެމީހުންގެ ޚިދުމަތްތަކުގެ އަގުވަޒަންކުރުމަކީވެސް މި ދުވަސް ފާހަގަކުރުމުގެ މުހިންމު ބޭނުމެކެވެ. އަދި އެމީހުންނަށް ކަމޭހިތުމާއި އަޅާލައި، އޯގާތެރިކަމާއެކު ޢަމަލުކުރުމަށް މުޖުތަމަޢު އަހުލުވެރިކުރުވުމަކީވެސް މި ދުވަހުގެ މަޤްޞަދެކެވެ.
ޢާއިލީ ތަރައްޤީއާބެހޭ ވުޒާރާއިން މި ދުވަހާ ގުޅިގެން ފާހަގަކުރައްވާފައިވަނީ، މާމަ ކާފައާއެކު އުފާވެރި ވަގުތު ހޭދަކޮށް، ޢާއިލާގެ މެދުގައި އޮންނަ ގުޅުން ރަނގަޅުކުރުމާއި، މާމަ ކާފައަށް ރައްކާތެރި މާޙައުލެއް ތަނަވަސްކޮށްދިނުމުގެ މުހިންމުކަމޔގައެވެ. އަދި ޅަކުދިންނާއި ޒުވާނުން މާމަ ކާފައިންނަށް އިޙްތިރާމްކުރުމާއި އަޅާލުން އިތުރުކުރުމަކީ ކޮންމެހެން ކުރަންޖެހޭ ކަމެއްކަމަށް އެ ވުޒާރާއިން ފާހަގަކުރައްވައެވެ.
މާމަދަރިންނާއި ކާފަދަރިންގެ ހިތްތަކުގައި މާމަ ކާފައަށް ލޯތްބާއި އިޙްތިރާމް އަށަގެންނެވުމަކީ ކޮންމެ މީހެއްގެވެސް ޒިންމާއެއްކަމަށް އެ ވުޒާރާއިން އިލްތިމާސްކުރައްވައެވެ.
