ފިޗް ރޭޓިންގްސްއިން ދިވެހިރާއްޖޭގެ ކްރެޑިޓް ރޭޓިންގ "ސީސީސީ+" އިން "ސީސީ" އަށް ދަށްކުރުމަކީ މިހާރުގެ ސަރުކާރުގެ މާލީ ސިޔާސަތުގެ ދޯހަޅިކަން ދައްކުވައިދޭ ކަމެއް ކަމަށް އިދިކޮޅު އެމްޑީޕީން ބުނެފިއެވެ.
އެމްޑީޕީން ނެރުނު ނޫސް ބަޔާނެއްގައި ބުނެފައިވަނީ، ތިން މަސްދުވަހުގެ ތެރޭގައި ދެވަނަ ފަހަރަށް، އަދި އެއްފަހަރާ ތިން ދަރަޖަ ތިރިއަށް ކްރެޑިޓް ރޭޓިންގ ދަށްކުރުމުން ސަރުކާރުގެ މާލީ ހާލަތު އިންތިހާއަށް ގޯސްވަމުންދާކަން ހާމަވާކަމުގައެވެ.
އެ ޕާޓީން ބުނެފައިވާ ގޮތުގައި މާލީ ހާލަތު ގޯސްވަމުންދާކަން ދައްކުވައިދޭ ކަންކަމުގެ ތެރޭގައި ދައުލަތުގެ ޚަރަދު ބޮޑުވުމާއި، މާލީ އިސްލާޙުތައް ލަސްކުރުމާއި، ރާއްޖޭގެ ރަސްމީ ރިޒާވް މެނޭޖްނުކުރެވި ދަށަށް ދިއުމާއި، ބޭރުން ފައިސާ ހޯދުމަށް ނުކުޅެދިފައިވުން ހިމެނެއެވެ.
އެމްޑީޕީން ދެކޭގޮތުގައި ފިޗުން ރޭޓިންގ ދަށްކުރުމުގެ މައިގަނޑު ސަބަބުތަކަކީ:
1. ސަރުކާރުގެ ޢަމަލުތަކުގެ ސަބަބުން ފަތުރުވެރިކަމަށާއި އިޤްތިޞާދަށް ލިބުނު ގެއްލުން.
2. ބޭކާރު އަދި ރޭވުމެއްނެތި ސަރުކާރުން ކުރާ ޚަރަދުތަކުގެ ސަބަބުން ރިޒާވް ހީނަރުވުން.
3. ފިސްކަލް ރިފޯމް ލަސްކުރުން.
އެމްޑީޕީން ގޮވާލާފައިވަނީ ބޭކާރު ޚަރަދުތައް ހުއްޓާލައި، މުހިންމު ނޫން ޚަރަދުތައް މަދުކުރުމުގެ އިތުރުން މާލީ އިސްލާޙުތައް އަވަސްކުރުމަށެވެ. އަދި ރަޙުމަތްތެރި ޤައުމުތަކާއި ބައިނަލްއަޤްވާމީ އިދާރާތަކުގެ އެހީތެރިކަން ހޯދައި ރާއްޖޭގެ ރިޒާވް ސަޕޯޓްކުރުމަށް ބޭނުންވާ ބޭރު ފައިސާ ހޯދުމަށް ވެސް ގޮވާލާފައިވެއެވެ.
އެ ޕާޓީން އިތުރަށް ގޮވާލާފައިވަނީ ދައުލަތުގެ މާލީ ހިސާބުތައް އާންމުކުރުމަށް އަލުން ފެށުމަށާއި، ރައްޔިތުންނަށް ތެދު ހާމަކުރުމަށާއި، ދެފުށް ފެންނަ ގޮތެއްގައި ކުރިއަށް ދިއުމަށެވެ. އަދި ޤައުމުގެ އިޤްތިޞާދީ މުސްތަޤްބަލާއި ރައްޔިތުންގެ ދުޅަހެޔޮކަން ރައްކާތެރިކުރުމަށް ސަރުކާރުން އިތުރު ބަހަނާ ނުދައްކައި މަސައްކަތްކުރުމަށް ވެސް އެމްޑީޕީން ގޮވާލާފައިވެއެވެ.
