ލޭނު މަސްވެރިކަމަށް ހުއްދަ ދިނުން ހުއްޓާލުމަށް ރައީސް ޑރ. މުޙައްމަދު މުއިއްޒު ނިންމެވުމާ ގުޅިގެން، ކުރީގެ ރައީސް މުޙައްމަދު ނަޝީދު އެކަމަށް ތާއީދު ފާޅުކުރައްވައިފިއެވެ.
ކެބިނެޓުން މިދިޔަ ޖޫން 13 ވަނަ ދުވަހު ނިންމެވީ ރާއްޖޭގައި ލޭނު މަސްވެރިކަން ހުޅުވާލުމަށެވެ. ނަމަވެސް، "ބޮޑު ކަންނެލި މަސްވެރީންގެ ޔޫނިއަން" އިން ހުށަހެޅި ކަންބޮޑުވުންތަކަށް ރިޢާޔަތްކުރައްވައި، ރައީސް މުއިއްޒު މިއަދު ނިންމެވީ ލޭނު މަސްވެރިކަމަށް ހުއްދަ ނުދެއްވުމަށެވެ.
ނަޝީދު އެކްސްގައި ޕޯސްޓްކުރެއްވި ލިޔުމެއްގައި ވިދާޅުވެފައިވަނީ، ލޭނު މަސްވެރިކަމުން ރާއްޖޭގެ ފަތުރުވެރިކަމަށާއި ބައިނަލްއަޤްވާމީ މާކެޓުގައި ރާއްޖޭގެ މަހުގެ އަގަށް ނޭދެވޭ އަސަރުކުރާނެ ކަމަށެވެ. އަދި މިކަމުގައި ރައީސް މުއިއްޒުގެ ނިންމެވުން ރަނގަޅު ކަމަށްވެސް އެމަނިކުފާނު ވިދާޅުވެފައިވެއެވެ.
މިކަމާ ގުޅިގެން ފިޝަރީޒް މިނިސްޓަރު އަޙްމަދު ޝިޔާމް އެކްސްގައި ވިދާޅުވެފައިވަނީ، ރައީސް އިސްކަންދެއްވާފައިވަނީ ސަރުކާރަށް ލިބޭނެ ނަފާއަށްވުރެ، މި ދާއިރާގައި މަސައްކަތްކުރާ ފަރާތްތަކުގެ ކަންބޮޑުވުންތަކަށް ކަމަށެވެ.
ރައީސް އޮފީހުން ބުނެފައިވާ ގޮތުގައި، މިކަމާ ގުޅޭގޮތުން އިތުރު މަޝްވަރާކުރެއްވުމަށް، ބޮޑު ކަންނެލި މަސްވެރީންގެ ޔޫނިއަނާއި އެހެނިހެން ގުޅުންހުރި ފަރާތްތަކާ ރައީސް އަވަހަށް ބައްދަލުކުރައްވާނެއެވެ.
ރާއްޖޭގައި ބޮޑުކަންނެލީގެ ލޭނު މަސްވެރިކަން ފުރަތަމަ ހުއްދަދެވުނީ 2012 ވަނަ އަހަރުއެވެ. ނަމަވެސް 2019 ގައި އެމްޑީޕީގެ ސަރުކާރުން މި މަސްވެރިކަމަށް ލައިސަންސް ދޫކުރުން ހުއްޓާލިއެވެ.
