ސަފިރުންގެ ގޭ ދޮށުގައި، ފަލަސްތީނުގެ ހައްގުގައި އަޑު އުފުލީ ފަލަސްޠީނުގެ ރަޢްޔިތުން އުފުލާވޭންތައް ހަދާން ކޮށްދިނުމަށް ކަމުގައި ދީނީ އިލްމުވެރިޔާ ޑރ. އިޔާޒް ވިދާޅުވެއްޖެއެވެ.
ސައުދީ ސަފީރުގެ ގެކޮޅު ކައިރީގައި ފަލަސްތީނު މައްސަލައާ ގުޅިގެން ސިލްސިލާކޮށް އިހުތިޖާޖުކުރަމުންދާ އަންހެނުންގެ ތެރެއިން ދެ ކަނބަލަކު ފުލުހުން އިއްޔެވަނީ ހައްޔަރުކޮށްފައެވެ.
މި ދެ ކަނބަލުންނަކީ ޝާދިޔާ އާއި ޑރ. ޝަޒުރާ އެވެ. ޝާދިޔާއަކީ ދީނީ އިލްމުވެރިޔާ ޑރ. މުހައްމަދު އިޔާޒް އަބްދުލްލަތީފްގެ އަނބިކަނބަލުންނެވެ. އޭނާ ހައްޔަރުކޮށްފައިވަނީ ޝީ ބިލްޑިންގ ކައިރިން، ފުލުހުންގެ ޓީމެއް އައިސް ކޯޓު އަމުރެއްގެ ދަށުންނެވެ.
އަނބިކަބަލުން ހައްޔަރު ކުރުމާއި ގުޅިގެން އިޔާޒް ކުރެއްވި އެކްސް ޕޯސްޓުގައި ވިދާޅުވީ ފަލަސްޠީނުގެ ރަޢްޔިތުން އުފުލާވޭންތައް އެހެންގޮތަކުން އެބަޔަކަށް އަޑު ނުއިވުނީމާ ލިޔެފައި ގެންގޮސް ގޭދޮށުގައި ބަހައްޓައިގެން ހަނދާންކޮށްދިނުމަކީ ގޯސްކަމެއް ނޫން ކަމުގައެވެ. އަދި މިއީ ހަނދާންކޮށްދިނުމެއް ކަމަށާއި، ހަނދާންކޮށްދިނުމަކީ މުއިމިނުންނަށް ފައިދާކުރާނެ ކަމެއް ކަމުގައިވެސް އިޔާޒް ވިދާޅުވިއެވެ.
އިޔާޒްގެ އެކްސް ޕޯސްޓުގައި ވިދާޅުވީ، ބަޔަކު މީހުން ޢަބްދުالله ބިން އުބައްޔު ބިން ސަލޫލްގެ މަންހަޖު ފޮލޯކުރިނަމަވެސް, އިޚްލާޞްތެރިކަމާއި އެކު ފަލަސްޠީނުގެ މައްސަލާގައި އަޑުއުފުލާނެ މީހުން މިޤައުމުގައި ތިބިކަން ހާމަކޮށްދޭންޖެހޭ ކަމަށެވެ.
އިސްރާއީލުގެ ޕާސްޕޯޓު މަނާކުރާނަމޭ ބުނެ ދޮގު ބަޔާންތައް ނެރި މެޑެލް ޖަހަން އުޅުނު, ޝަހީދުއިސްމާޢީލް ހަނިއްޔާގެ މައްޗަށް ކަށުނަމާދު ކުރަން ސީދާ ބަހުން ބުނަން ނުކެރި ކުރާނެ ބަޔަކު ކުރާށޭ ބުނެ, އެކަކުވެސް ރާއްޖޭގެ ހުރިހާ ހުކުރުކުރާ މިސްކިތެއްގައި ޣައިބަށް ކަށުނަމާދު ކޮށްފީމޭ ބުނެ ދޮގުފަތުރަން އުޅުނީވެސް އުބައްޔު ބިން ސަލޫލްގެ މަންހަޖުގެ މީހުން.
އިޔާޒުގެ އެކްސް ޕޯސްޓުގައި ވިދާޅުވެފައި ވެއެވެ.
އިޔާޒް އިތުރަށް ވިދާޅުވީ އެންމެ ދެއަންހެނުން ގެއެއްގެ ކުރިމައްޗަށް ގޮސް ހިމޭން މުޒާހަރާ ކުރުމަކީ މީހަކަށް ބިރުދެއްކުން ކަމަށް ބުނުމަކީ ވަކި ބަޔެއްގެ އަޅުވެތިވެ ސިހިފައިވާ މީންވަރު ދައްކުވައިދޭ ވަރުގަދަ ހެއްކެއް ކަމުގައެވެ. އަދި ދުނިޔޭގައި މެޑެލް ޖަހަން އުޅުމަށްވުރެ އިޚްލާޞްތެރިކަން އިސްކޮށް އާޚިރަތަށްޓަކައި މަސައްކަތް ކުރުން ބުއްދިވެރިވާނެ ކަމަށް އިޔާޒް ވިދާޅުވެފައި ވެއެވެ.
ބައެއް ފަރާތްތަކުން ތުހުމަތު ކުރާ ގޮތުގައި މި އިހުތިޖާޖުތަކާ ގުޅިގެން ސައުދީ އަރަބިއްޔާއިން ކުރަމުންދާ ޕްރެޝަރާ އެކު، ސަރުކާރުން ވަނީ އިހުތިޖާޖުކުރާ ފަރާތްތަކާ މެދު ފިޔަވަޅު އެޅުމުގެ މަސައްކަތް ފަށާފައެވެ.
