ރަޝިޔާއިން ޔުކްރެއިނަށް ދޭ ވައިގެ ހަމަލާތަކާ ގުޅިގެން އދ. ގެ ސަލާމަތީ މަޖިލީހުން ފިޔަވަޅު ނާޅާކަމަށް ރާއްޖޭގެ ކުރީގެ ރައީސް މައުމޫން ޢަބްދުލްޤައްޔޫމް ސޯޝަލް މީޑިއާގައި ކުރެއްވި ޕޯސްޓަކަށް ރާއްޖޭގައި ހުންނަވާ ރަޝިޔާގެ ސަފީރު ނުރުހުން ފާޅުކުރައްވައިފިއެވެ.

މައުމޫން އެކްސްގައި ކުރެއްވި ޕޯސްޓެއްގައި، ރަޝިޔާއިން ޔުކްރެއިނަށް ދޭ ވައިގެ ހަމަލާތަކާމެދު އދ. ގެ ސަލާމަތީ މަޖިލީހުން އަޅާނުލާތީ، އެ މަޖިލިސް ވުޖޫދުގައި އޮތްތޯ ސުވާލު އުފައްދަވާފައިވެއެވެ.

މައުމޫނުގެ އެކްސް ޕޯސްޓަށް ރައްދުދެއްވަމުން، ރަޝިޔާ އެމްބަސީގެ ރަސްމީ ފޭސްބުކް ޕޭޖުގައި ސަފީރު ލިވަން އެސް ޖަގަރްޔަން ވިދާޅުވެފައިވަނީ ރަޝިޔާއިން ޔުކްރެއިނާ ދެކޮޅަށް އަސްކަރީ ހަރަކާތެއް ފަށަން ޖެހުނު ސަބަބު މައުމޫނަށް ހަނދާންކޮށްދެއްވާފައެވެ. އޭނާ ފާހަގަކުރެއްވި ގޮތުގައި، ޔުކްރެއިންގެ ރައީސްގެ ސަބަބުން ޑޮންބާސް ސަރަހައްދުން ގިނަ އަދަދެއްގެ އާންމުން މަރުވެދިޔަކަމާމެދު މައުމޫން ކަންބޮޑުވެވަޑައިނުގަންނަވާކަން ފާހަގަކުރެއްވިއެވެ.

ރަޝިއާ ސަފީރު ވިދާޅުވެފައިވަނީ، 2022 އިން ފެށިގެން ހަތަރު ފަހަރެއްގެ މަތިން ރަޝިޔާއިން ސުލްޙަ ގާއިމުކުރުމަށް އިސްނަގާފައިވާ ކަމަށާއި، ނަމަވެސް އެމެރިކާއާއި އިނގިރޭސިވިލާތުން މި މަސައްކަތްތަކަށް ހުރަސްއަޅައި، ޔުކްރެއިންގެ ރައީސް ޒެލެންސްކީއަށް ހަނގުރާމަ ކުރިއަށް ގެންދިއުމަށް ހިތްވަރުދީފައިވާ ކަމަށް ތުހުމަތުކުރެއްވިއެވެ.

އަދި ހުޅަނގުގެ ގައުމުތަކުން ގެންގުޅޭ ތަފާތުކުރުމުގެ ސަގާފަތަށް ތާއީދުނުކުރުމަށް މައުމޫނަށް ގޮވާލައްވައި، އޭގެ ބަދަލުގައި ޣައްޒާގައި ފަލަސްތީނުގެ ރައްޔިތުން ދަނީ ތަޙައްމަލުކުރަމުންދާ ހިތްދަތިކަމަށް ނިމުމެއް ގެނައުމަށް އދ. ގެ ސަލާމަތީ މަޖިލީހުން ނުކުޅެދިފައިވާ ކަމާމެދު ކަންބޮޑުވުން ފާޅުކުރެއްވުމަށް ސަފީރު މައުމޫނަށް ގޮވާލެއްވިއެވެ.