މާލެ ސަރަހައްދުގައި ޤާނޫނާ ޚިލާފަށް ވިޔަފާރިކުރަމުންދާ އަދި ޞައްޙަ ވިސާއެއް ނެތި ދިރިއުޅެމުންދާ ބިދޭސީން ހޯދުމަށް މޯލްޑިވްސް އިމިގްރޭޝަނުން ފުޅާ ދާއިރާއެއްގައި ޚާއްޞަ އޮޕަރޭޝަނެއް ފަށައިފިއެވެ.
އިމިގްރޭޝަނުން އެކްސްގައި ޝާއިޢުކުރި ޕޯސްޓެއްގައި ބަޔާންކޮށްފައިވާ ގޮތުގައި، މި އޮޕަރޭޝަންގައި އިމިގްރޭޝަންގެ 211 އޮފިސަރުން ބައިވެރިވެއެވެ. މި އޮފިސަރުން 52 ގްރޫޕަކަށް ބަހާލައިގެން، މާލެ ސަރަހައްދުގެ 26 ޒޯނެއް ބަލައި ފާސްކުރުމަށް ވަނީ ހަމަޖެހިފައެވެ.
އިމިގްރޭޝަނުން އިތުރަށް ހާމަކޮށްފައިވަނީ މި އޮޕަރޭޝަންގެ މައިގަނޑު މަޤްޞަދަކީ މާލެ ސަރަހައްދުގައި ޤާނޫނާ ޚިލާފަށް ކުދި އަދި މެދު ފަންތީގެ ވިޔަފާރިތައް ހިންގަމުންދާ ބިދޭސީން ދެނެގަތުމާއި، އެފަދަ ފަރާތްތަކަށް އިމިގްރޭޝަނަށް ހާޒިރުވުމަށް އެންގުމެވެ. މީގެ އިތުރުން، ޤާނޫނާ ޚިލާފަށް ބިދޭސީން ލައްވައި މަސައްކަތް ކުރުވާ ދިވެހިންނަށް ލިޔުމުން ނަސޭހަތްތެރިވުމަށްވެސް ވަނީ ހަމަޖެހިފައެވެ.
މި އޮޕަރޭޝަނުން ލިބޭ މަޢުލޫމާތުގެ އަލީގައި މާލެ ސަރަހައްދުގެ މިހާރުގެ ހާލަތު ދެނެގަނެވޭނެ ކަމަށް އިމިގްރޭޝަނުން ބުނެފައިވެއެވެ.
ދިވެހިރާއްޖޭގައި ޤާނޫނާ ޚިލާފަށް ދިރިއުޅެމުންދާ ބިދޭސީން ހޯދުމަށް އިމިގްރޭޝަނުން ކުރަމުންދާ މަސައްކަތުގެ ތެރެއިން، ވޭތުވެދިޔަ ނުވަ މަސްދުވަހުގެ ތެރޭގައި 3,322 ބިދޭސީން ހައްޔަރުކޮށް، ޤައުމުން ބޭރުކުރުމުގެ ފިޔަވަޅު އަޅާފައިވާކަން ފާހަގަކޮށްލެވެއެވެ.
