ފެނަކަ ކުންފުނި އެސްޓީއޯގެ ދަށަށް ބަދަލުކުރުމަކީ އެ ކުންފުނީގެ ކުރިމަގަށް ކުރެވޭ މުހިންމު އިންވެސްޓްމަންޓެއްކަމަށް އެސްޓީއޯގެ މެނޭޖިންގ ޑިރެކްޓަރު ޝިމާދު އިބްރާހީމް ވިދާޅުވެއްޖެއެވެ. ޝިމާދު އިބްރާހީމް މިހެން ވިދާޅުވީ މި ބަދަލާ ގުޅިގެން މިއަދު ބޭއްވުނު ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ނިންމެވުމާ އެއްގޮތަށް، މިއަހަރުގެ ނިޔަލަށް ފެނަކަ ކޯޕަރޭޝަން ލިމިޓެޑުގެ ހުރިހާ ހިއްސާއެއް އެސްޓީއޯއިން ގަނެ، އެ ކުންފުނީގެ ސަބްސިޑަރީއެއްގެ ގޮތުގައި ހަމަޖެއްސުމުގެ މަސައްކަތް މިހާރު ވަނީ ފަށާފައެވެ. އެސްޓީއޯއިން ބުނާ ގޮތުގައި، ފެނަކަ ކުންފުނީގެ ހާލަތު މިނިވަން އޮޑިޓް ފާމެއް މެދުވެރިކޮށް ދެނެގަތުމަށްފަހު، އަންނަ އަހަރުގެ ޖެނުއަރީ މަހުން ފެށިގެން އެ ކުންފުނި އެސްޓީއޯގެ ދަށުން ހިންގަން ފަށާނެއެވެ.
މި މުއްދަތުގެ ތެރޭގައި ފެނަކައިގެ މާލީ އަދި ޤާނޫނީ ޑިޔު ޑިލިޖެންސް ހެދުމާއި، ކުންފުނީގެ މުދަލާއި ވަސީލަތްތަކުގެ އަގުކުރުމާއި، މާލީ ހާލަތު ދެނެގަތުމުގެ މަސައްކަތް ކުރިޔަށް ގެންދިއުމަށް ވަނީ ހަމަޖެހިފައެވެ. އަދި މާލީ ވުޒާރާގެ އިރުޝާދުގެ ދަށުން، ކުންފުނީގެ ޤާބިލުކަމާ އެއްވަރަށް ރީސްޓްރަކްޗަރ ކުރުމުގެ މަސައްކަތްތައް ކުރިޔަށް ގެންދިއުމަށް އެސްޓީއޯގެ ޑިރެކްޓަރުންގެ ބޯޑުން ވަނީ ނިންމާފައެވެ.
ފެނަކައަކީ މިހާރުގެ ސަރުކާރު ހަވާލުވިއިރު ދައުލަތުގެ ކުންފުނިތަކުގެ ތެރެއިން މާލީ ހާލަތު އެންމެ ދަށް ކުންފުންޏެވެ. އެ ކުންފުނީގެ ދަރަނި 4.3 ބިލިއަން ރުފިޔާއަށް އަރާއިރު، މީގެ ބޮޑު ބަޔަކީ އެސްޓީއޯއަށް ދައްކަންޖެހޭ ފައިސާއެވެ. ޝިމާދު އިބްރާހީމް ވިދާޅުވި ގޮތުގައި، ފެނަކައިގެ ދަރަނި ދައްކަންޖެހޭ ފަރާތްތަކަށް ދެއްކުމަށް ޕްލޭންތައް އެކުލަވާލައި، ދުރުރާސްތާގައި ފެނަކައަކީ އެސްޓީއޯއަށް ފައިދާކުރަނިވި ކުންފުންޏަކަށް ހެދުމަށް އަމާޒު ހިފާފައިވެއެވެ.
އެސްޓީއޯއިން މި ބަދަލު ގެންނަނީ ކުރުމުއްދަތުގެ ފައިދާއަކަށް ނޫންކަމަށާއި، ފެނަކައަކީ އެސްޓީއޯގެ ކުރިމަގަށް ވަރަށް މުހިންމު އިންވެސްޓްމަންޓެއްގެ ގޮތުގައި ދެކޭކަމަށް ޝިމާދު ވިދާޅުވިއެވެ. އަދި ރަނގަޅު ބަދަލެއް ފެންނަން 2-3 އަހަރު ނަގާފާނެކަމަށް އޭނާ ލަފާކުރެއްވިއެވެ.
މި ބަދަލަކީ އިޔާދަކުރަނިވި ހަކަތައިގެ ދާއިރާއަށް އެސްޓީއޯ ވަނުމަށް އެޅޭ މުހިންމު ފިޔަވަޅެއްގެ ގޮތުގައި އެ ކުންފުނިން ދެކޭކަމަށްވެސް ޝިމާދު ފާހަގަކުރެއްވިއެވެ. އެސްޓީއޯއިން ފެނަކައިގެ ހިންގުން ހަރުދަނާކޮށް ބޮޑެތި ބަދަލުތަކެއް ގެނައުމަށް ވަނީ ހަމަޖެހިފައެވެ. އަދި ފެނަކައިން ކުރިއަށް ގެންގޮސްފައިވާ މަޝްރޫޢުތަކަކީ ދެމެހެއްޓެނިވި މަންފާ އޮތް މަޝްރޫޢުތަކެއްނަމަ، އެ މަޝްރޫޢުތައް ކުރިއަށް ގެންދިއުމަށްވެސް އެސްޓީއޯއިން ވަނީ ނިންމާފައެވެ.
ފެނަކައިގެ މެނޭޖިންގ ޑިރެކްޓަރު މުޢާޒް މުޙައްމަދު ރަޝީދު ވިދާޅުވި ގޮތުގައި، މި ބަދަލުގެ ސަބަބުން ފެނަކައިން ތެލަށް ކުރަންޖެހޭ ޚަރަދު ވަރަށް ބޮޑަށް ކުޑަކުރެވި، ހިންގުން ހަރުދަނާވާނެއެވެ. އަދި ރައްޔިތުންނަށް ދެމުންދާ ޚިދުމަތް މެދުނުކެނޑި ފޯރުކޮށްދެވޭނެ ކަމަށްވެސް އޭނާ ވިދާޅުވިއެވެ. އެސްޓީއޯގެ ގަވަރނަންސްގެ ތަޖުރިބާ ބޭނުންކޮށްގެން ފެނަކައިގެ ހިންގުން އިތުރަށް ހަރުދަނާކުރެވޭނެކަމަށް މުޢާޒް ޤަބޫލުކުރައްވައެވެ.
މި ބަދަލު ގެނެވޭއިރު، މިހާރުވެސް 7,100 މުވައްޒަފުން ފެނަކައިގައި މަސައްކަތްކުރަމުން ގެންދެއެވެ.
