އިސްލާމީ މިނިސްޓްރީން، ކީރިތި ޤުރުއާން ހިތުދަސްކުރާ ފަރާތްތަކަށް އުމްރާ ދަތުރު ހަދިޔާކުރުމުގެ އައު މަޝްރޫއެއް ފަށައިފިއެވެ. މި މަޝްރޫއުގެ އިފްތިތާހީ ރަސްމިއްޔާތުގައި، ފުރަތަމަ ފުރުސަތު ލިބުނު ހާފިޒަށް އެކަމުގެ ލިޔުން ހަވާލުކޮށްދެވުނެވެ.
މި ފުރުސަތު ލިބުނީ އަލްހާފިޒް އަލީ ރައީފަށެވެ. އޭނާއަށް ލިޔުން ހަވާލުކޮށްދެއްވީ އިސްލާމީ ކަންތައްތަކާ ބެހޭ ވަޒީރު، ޑރ. މުހައްމަދު ޝަހީމް އަލީ ސައީދެވެ.
ރަސްމިއްޔާތުގައި ވާހަކަފުޅު ދައްކަވަމުން، ޑރ. ޝަހީމް ފާހަގަކުރެއްވި ގޮތުގައި އަލީ ރައީފަކީ ޚާއްޞަ ހާފިޒެކެވެ. އޭނާވަނީ ޤުރުއާނުގެ އާޔަތްތައް އޭގެ ނަންބަރުތަކާއެކު އެންމެ މަތީ ފެންވަރަށް ހިތުދަސްކުރައްވާފައެވެ.
މި މަޝްރޫއުގެ މަޤްޞަދަކީ ޤުރުއާން ހިތުދަސްކުރާ ފަރާތްތަކަށް ހިތްވަރުދިނުމެވެ. މިކަން ކުރިއަށް ގެންދަނީ ހެޔޮއެދޭ ފަރާތްތަކުގެ އެހީތެރިކަމާއެކުގައި ކަމަށްވެސް ވަޒީރު ވިދާޅުވިއެވެ.
މި މަޝްރޫއު ފެށުމަށް ނިންމާފައިވާކަން ވަޒީރު އިޢުލާންކުރެއްވީ ކީރިތި ޤުރުއާން ކިޔެވުމުގެ 36 ވަނަ ޤައުމީ މުބާރާތުގެ ނިންމުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ.
