ހުޅުމާލޭގެ ދެވަނަ ފިޔަވަހީގައި ތަރައްޤީކޮށްފައިވާ ހިޔާ ފްލެޓްތަކުގައި އިތުރު ލިފްޓް ހަރުކުރުމުގެ 23 އިންސައްތަ މަސައްކަތް ނިމިފައިވާކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)އިން ހާމަކޮށްފިއެވެ.
އެޗްޑީސީން ޢާންމުކުރި ވީޑިއޯ ކްލިޕެއްގައި، އެ ކުންފުނީގެ ޕަބްލިކް ރިލޭޝަންސްގެ އެސިސްޓެންޓް ޑިރެކްޓަރު ހަސަން ޝަހީދު ވިދާޅުވެފައިވަނީ ހިޔާ ފްލެޓްގެ ކޮންމެ ޓަވަރެއްގައި އިތުރު ދެ ލިފްޓް ހަރުކުރުމުގެ ޢަމަލީ މަސައްކަތް ފަށާފައިވާ ކަމަށެވެ.
ޝަހީދު އިތުރަށް ވިދާޅުވި ގޮތުގައި، މި ލިފްޓްތަކަކީ ޖާގަ ތަނަވަސް ލިފްޓްތަކެކެވެ. "15 މީހުންގެ ޖާގައިގެ މި ލިފްޓްތަކުގައި ބަލިމީހުން ސްޓްރެޗަރުގައި އެރުވޭނެ ޖާގަ ހުންނާނެ. އަދި މި ލިފްޓްތަކުގެ ފްލޯ ނަންބަރުތައް ވަނީ ބްރެއިލްއިން އެންގްރޭވްކުރެވިފައި. އެހެންކަމުން ލޮލަށް ފެނުމުން މަޙްރޫމްވެފައިވާ ފަރާތްތަކަށް އެހެން ފަރާތެއްގެ އެހީތެރިކަމާ ނުލައި ލިފްޓްތައް ބޭނުންކުރުމުގެ ފުރުޞަތު ލިބިގެންދާނެ،" ޝަހީދު ވިދާޅުވިއެވެ.
ހިޔާގެ 16 ޓަވަރުގެ ތެރެއިން 13 ޓަވަރެއްގައި ޢަމަލީ މަސައްކަތް ކުރިއަށްދާ ކަމަށާއި، ބާކީ އޮތް ތިން ޓަވަރުގެ މަސައްކަތް ކުރިއަށް އޮތް ދެ ހަފްތާގެ ތެރޭގައި ފެށޭނެ ކަމަށްވެސް އޭނާ ވިދާޅުވިއެވެ.
ޝަހީދު އިތުރަށް ވިދާޅުވި ގޮތުގައި، މުޅި ޕްރޮޖެކްޓް އަންނަ އަހަރުގެ ތެރޭގައި ނިމި، ހިޔާ ފްލެޓްގެ ރައްޔިތުންނަށް އައު ލިފްޓްތައް ބޭނުންކުރެވެން ފެށޭނެއެވެ.
ހިޔާ ފްލެޓްގެ ކޮންމެ ޓަވަރެއްގައި އިތުރު ދެ ލިފްޓް ހަރުކޮށްދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދެއް ކަމެވެ.
