ވަނީ އެއްގަމު ދަތުރުފަތުރުގެ ގާނޫނާ އެއްގޮތަށް ރަޖިސްޓްރީ ނުކޮށް ބަންޑާރަ މަގުތަކުގައި ދުއްވާ އަދި ޕާކުކުރާ އުޅަނދުތަކާއި، އެހެން ޒޯންތަކުގައި ރަޖިސްޓްރީ ކޮށްފައިވާ އުޅަނދުތައް ހުޅުމާލެއަށް ބަދަލުކުރުމަށް ޓްރާންސްޕޯޓު މިނިސްޓްރީން އަންގައިފިއެވެ.
މިނިސްޓްރީން މިއަދު ނެރުނު ބަޔާނެއްގައި ބުނެފައިވަނީ، އޭ ޒޯންގައި ގަވާއިދާ ޚިލާފަށް ދުއްވުމާއި ޕާކުކުރުން ހުއްޓުވައި، މި އުޅަނދުތައް ގާނޫނުގެ ތެރެއަށް ގެނައުމަށްޓަކައި، ކަމާ ގުޅުންހުރި އެހެން މުއައްސަސާތަކާ ގުޅިގެން ހުޅުމާލޭ ލޮޓް ނަންބަރު 452 ގައި މިފަދަ އުޅަނދުތައް ވަގުތީގޮތުން ބެހެއްޓުމުގެ އިންތިޒާމު ހަމަޖައްސާފައިވެއެވެ.
އިޢުލާން: މާލެ ސަރަހައްދުގައި ގަވާއިދާ ޚިލާފަށް ބޭނުންކުރަމުންދާ އުޅަނދުތައް ގާނޫނާއި ގަވާއިދުތަކުގެ ތެރެއަށް ގެނައުމުގެ ފުރުސަތު ދިނުމާ ގުޅޭ pic.twitter.com/TDiO3MmvO1
— Ministry of Transport and Civil Aviation (@MoTCAmv) August 26, 2024
ޓްރާންސްޕޯޓު މިނިސްޓްރީން ވަނީ މި އުޅަނދުތައް ވީ އެންމެ އަވަހަކަށް ޚާއްޞަކުރެވިފައިވާ ބިމަށް ގެންދިއުމަށް އެދި، މި އެންގުމާ ޚިލާފުވާ އުޅަނދުތަކާމެދު ފިޔަވަޅު އަޅާނެކަން އަންގާފައެވެ.
މިދިޔަ ބުރާސްފަތި ދުވަހު ސަރުކާރުން ހާމަކުރި ގޮތުގައި، މާލޭގައި ގަވާއިދާ ޚިލާފަށް ޕާކުކޮށްފައި ހުރި އުޅަނދުފަހަރު ގަވާއިދަށް ފެއްތުމަށް ފުރުޞަތެއް ދޭން ނިންމާފައިވެއެވެ. ޓްރާންސްޕޯޓު މިނިސްޓަރު މުޙައްމަދު އަމީން ވިދާޅުވި ގޮތުގައި، މި ޖާގަ ދެވެނީ ހަ މަސް ދުވަހަށް ކަމަށާއި، މިއީ އާންމުންނަށް ފަސޭހަކޮށްދިނުމުގެ ގޮތުން ކުރާ ކަމެކެވެ.
މިނިސްޓަރުގެ ލަފާގައި، 40 ހާސް އަކަފޫޓުގެ މި ބިމުގައި ހަތަރު ފުރޮޅުލީ 200 ވަރަކަށް އުޅަނދުފަހަރު ބެހެއްޓޭނެއެވެ.
