ސަރުކާރުގެ ޚަރަދުތައް ހަމަޖެއްސުމަށް 1.8 ބިލިއަން ރުފިޔާގެ ޓްރެޜަރީ ބިލް (ޓީ-ބިލް) ވިއްކާއިފިއެވެ. މާލީ ވުޒާރާއިން މި އަދަދަށް ވިއްކާލާފައިވަނީ ޖުމުލަ 4 ޓީ-ބިލެވެ.
މި ބިލްތަކުގެ ތެރޭގައި ހިމެނެނީ 28 ދުވަހުން އަނބުރާ ދެއްކުމަށް ވިއްކާލި 1.3 ބިލިއަން ރުފިޔާގެ ޓީ-ބިލާއި، 98 ދުވަހުން އަނބުރާ ދެއްކުމަށް ވިއްކާލި 20 މިލިއަން ރުފިޔާގެ ޓީ-ބިލެވެ. މީގެ އިތުރުން 182 ދުވަހުން އަނބުރާ ދެއްކުމަށް 231 މިލިއަން ރުފިޔާގެ ޓީ-ބިލަކާއި، 364 ދުވަހުން އަނބުރާ ދެއްކުމަށް 294 މިލިއަން ރުފިޔާގެ ޓީ-ބިލެއް ވިއްކާފައިވެއެވެ.
މި ޓީ-ބިލްތަކުގެ އިންޓްރެސްޓް ރޭޓް ހުރީ 3.50 އިންސައްތައާއި 4.60 އިންސައްތައާ ދެމެދުގައެވެ. ޓީ-ބިލަކީ ބަޖެޓުގެ ދަރަނި ފޫބެއްދުމަށް ވިއްކާ ދައުލަތުގެ ދަރަންޏެކެވެ. މި ބިލްތައް ވިއްކަނީ އޭގެ އަސްލު އަގަށްވުރެ ހެޔޮކޮށެވެ. އަދި ކަނޑައެޅިފައިވާ މުއްދަތު ހަމަވުމުން، އޭގެ ފައިސާ އަނބުރާ ދައުލަތުން އެ ފަރާތަކަށް އަސްލު އަގުގައި އަދާކުރާ ގޮތަށެވެ. މި ގޮތުން ޓީ-ބިލަށް އިންވެސްޓްކުރާ ފަރާތްތަކަށް ފައިދާ ލިބެއެވެ.
މިހާރު ރާއްޖޭގައި ޓީ-ބިލްގައި އިންވެސްޓްކުރަނީ ބޭންކުތަކާއި، ޕަބްލިކް ކުންފުނިތަކާއި، ޕެންޝަން އޮފީހުގެ އިތުރުން އަމިއްލަ ކުންފުނިތަކުންނެވެ.
