ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން އިލެކްޓްރިކް ވެހިކަލް ޗާޖިންގ ސްޓޭޝަނެއް ޤާއިމްކުރުމަށް ނިންމައިފިއެވެ. މިއީ އިލެކްޓްރިކް އުޅަނދުފަހަރު ބޭނުންކުރުން އިތުރުކުރުމަށް ހިތްވަރުދިނުމުގެ ގޮތުން ކުރެވޭ މަސައްކަތެއްކަމަށް ސްޓެލްކޯއިން ބުނެފައި ވެއެވެ.
ސްޓެލްކޯގެ މެނޭޖިންގ ޑިރެކްޓަރ ޙުސައިން ފަހުމީ ކުރެއްވި އެކްސް ޕޯސޓެއްގައި ވިދާޅުވީ މިއީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ތިމާވެށި ރައްކާތެރިކުރުމުގެ ސިޔާސަތުގެ ދަށުން ކުރިއަށްގެންދެވޭ މަސައްކަތެއް ކަމުގައެވެ.
މި މަޝްރޫޢުގެ މައިގަނޑު މަޤްޞަދުތަކުގެ ތެރޭގައި ކާބަން ބޭރުކުރާ މިންވަރު މަދުކުރުމާއި ޤައުމީ އަދި ބައިނަލްއަޤްވާމީ ފެންވަރުގައި އަންނަމުންދާ ކުރިއެރުންތަކާ އެއްހަމައެއްގައި ދެމިތިބުމާއި، ތިމާވެށްޓާ ރައްޓެހި އުޅަނދުފަހަރަށް އޮންނަ ޑިމާންޑަށް އިޖާބަދިނުމާއި އިލެކްޓްރިކް އުޅަނދު ބޭނުންކުރާ އަދި ބޭނުންކުރަން ގަސްދުކުރާ ފަރާތްތަކަށް އިތުރު ފަސޭހަތައް ފޯރުކޮށްދިނުން ހިމެނެއެވެ.
ޗާޖިންގ ސްޓޭޝަން ޤާއިމްކުރެވޭނީ ސްޓެލްކޯ ހެޑް އޮފީހާ ޖެހިގެން އޮންނަ ދޮންއަދަރާދަ ހިނގުމުގައެވެ. މި މަޝްރޫޢު ކުރިއަށް ގެންދިއުމުގައި މާލޭ ސިޓީ ކައުންސިލުގެ ފުރިހަމަ އެއްބާރުލުން ލިބޭނެކަމަށް ފަހުމީ ވިދާޅުވިއެވެ.
މި ސްޓޭޝަން ޤާއިމްކުރުމުގެ މަސައްކަތް މިހާރުވެސް ދަނީ ކުރިއަށެވެ. މި ސްޓޭޝަނުގައި ހަތަރު ފުރޮޅުލީ އަދި ދެ ފުރޮޅުލީ އުޅަނދުފަހަރު ޗާޖްކުރެވޭނެއެވެ.
