މީގެކުރިންވެސް އުވާލަން ނިންމި އެމްއާރުއެމް އުވާލަން އަނެއްކާވެސް އިލެކްޝަންސް ކޮމިޝަނުން ނިންމައިފިއެވެ.
އިލެކްޝަންސް ކޮމިޝަނުން ކުރި އެކްސް ޕޯސްޓެއްގައި ބުނެފައިވަނީ ސިޔާސީ ޕާޓީގެ ޤާނޫނު ލާޒިމުކުރާ ޢަދަދަށް 3000 (ތިންހާސް) މެންބަރުން ހަމަވެފައިނުވާތީ މޯލްޑިވްސް ރިފޯމް މޫވްމަންޓް (އެމް.އާރް.އެމް) އުވާލުމަށް އެކޮމިޝަނުން ނިންމާފައިވާ ކަމުގައެވެ.
މިއީ އެމްއާރުއެމް އުވާލުމަށް އިލެކްޝަންސް ކޮމިޝަނުން ނިންމި ދެވަނަ ފަހަރެވެ. ފުރަތަމަ ފަހަރު އެމްއާރުއެމްއިން އެ މައްސަލަ ސިވިލް ކޯޓަށް ހުށަހެޅުމުން، ފެބްރުއަރީ މަހު އެ ކޯޓުން ވަނީ އިލެކްޝަންސް ކޮމިޝަނުގެ ނިންމުން ޤާނޫނާ ޚިލާފު ކަމަށް ކަނޑައަޅާފައެވެ. ސިވިލް ކޯޓުގެ ޙުކުމުގައި ބުނެފައިވަނީ އިލެކްޝަންސް ކޮމިޝަނުން މެންބަރުންގެ އަދަދު ކަށަވަރުކުރުމަށް ނޯޓިސް ދިނުމުގައި ޤާނޫނީ އިޖުރާއާތުތައް ފުރިހަމަކޮށްފައިނުވާ ކަމަށެވެ.
ސިވިލް ކޯޓުގެ ނިންމުން އިލެކްޝަންސް ކޮމިޝަނުން ވަނީ ހައިކޯޓުގައި އިސްތިއުނާފުކޮށްފައެވެ. އެހެންނަމަވެސް، އިލެކްޝަންސް ކޮމިޝަނުގެ ސެކްރެޓަރީ ޖެނެރަލް އަބްދުﷲ އުނައިސް ވިދާޅުވެފައިވަނީ ކޯޓު އަމުރަށް 6 މަސްދުވަސް ފާއިތުވެފައިވާއިރުވެސް އެމްއާރުއެމްއިން މެންބަރުން އިތުރުކުރުމަށް މަސައްކަތްކޮށްފައިނުވާ ކަމަށެވެ. މި ސަބަބަށްޓަކައި، އެމްއާރުއެމް އުވާލުމަށް އަލުން ނިންމާފައިވާކަމަށް އުނައިސް ވިދާޅުވިއެވެ.
