ރާއްޖެއަށް ކުރިމަތިވަމުންދާ ޑޮލަރުގެ މައްސަލަ ހައްލު ކުރުމަށް، ޚަރަދު ކުޑަކޮށް، ސިޔާސީ ވަޒީފާތައް މަދުކޮށް، ކޮރަޕްޝަންގެ އަމަލުތައް ހުޓުވުމަށް އެމްޓީއޭއިން ގޮވާލައިފިއެވެ.

ރާއްޖެއަށް ކުރިމަތިވެފައިވާ ޑޮލަރުގެ ތާށިކަން އިންތިހާއަށް މަތިވެ، ބީއެމްއެލްއަށް ކުދިމަތިވެފައިވާ ޑޮލަރުގެ ތާށީކަމަށް ހައްލު ހޯދުމަށް ބޭނުންކުން ކުރެވޭ ޑޮލަރުގެ މުއާމަލާތައްކަށް ހިފެހެއްޓުންތަކެއް ގެނެސްފައިވަނިކޮށް އެމްޓީއޭއިން ނެރުނު ނޫސް ބަޔާނެއްގައި ބުނެފައިވަނީ،  ފާއިތުވި މަސްތަކުގައި ދިވެހިރާއްޖޭގައި ޑޮލަރުގެ ދަތިކަން އިތުރުވަމުން އައިސް، މިހާރު ޑޮލަރު ލިބުމުގެ ދަތިކަން އިންތިހާއަށް ބޮޑު ވެފައިވާ ކަމުގައެވެ. އަދި ޑޮލަރުގެ ބްލެކް މާރކެޓެއް އުފެދި، ޑޮލަރުގެ އަގު މިއިން ޒަމާނަކު މަތި ނުވާ ދަރަޖައަށް މަތިވެ، ވިޔަފާރިތަކަށާއި އާންމު ރައްޔިތުންނަށް އިގްތިސާދީ އަދި މާލީ ބޮޑެތި ގޮންޖެހުންތަކާ ވަނީ ކުރިމަތިލާން ޖެހިފައިވާކަމަށްވެސް އެމްޓީއޭއިން ބުނެފައިވެއެވެ.

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހާމަކޮށްފައިވާ މަޢުލޫމާތުގެ މައްޗަށް ބިނާކޮށް ބަލާއިރު، ފާއިތުވި ތިން މަސްދުވަހުގެ ތެރޭގައި ޑޮލަރުގެ ރަސްމީ ރޭޓާއި ނުރަސްމީ ރޭޓާ ދެމެދުގައިވާ ތަފާތު ވަނީ 20 އިންސައްތައަށްވުރެ އިތުރުވެފައެވެ. ނުރަގަޅު މި ބޮޑު ބަދަލުގެ ސަބަބުން އާންމު ފަރުދުންނާއި އާންމު ވިޔަފާރިވެރިން ޑޮލަރު ގަތުމަށް ބޮޑު އަގެއް މިވަނީ ދައްކަން ޖެހިފައެވެ.

ރާއްޖޭގައި ޑޮލަރު ތާށިކަން އިތުރުވެ، ބޭންކް އޮފް މޯލްޑިވްސް (ބީއެމްއެލް)ގެ ރުފިޔާ ކާޑުތަކުން ކުރެވޭ ބޭރުގެ މުޢާމަލާތްތައް ހަނިކުރުމަށް ހަރުކަށި ފިޔަވަޅުތަކެއް އަޅާފައިވާކަން މި ޖަމިއްޔާއިން ފާހަގަ ކުރަމެވެ. އޭގެ ތެރޭގައި ރުފިޔާ ކާޑުތަކުން ކުރެވޭ ބޭރުގެ މުޢާމަލާތްތައް މުޅިން ހުއްޓާލުމާއި، ބައެއް ކްރެޑިޓް ކާޑުތަކުގެ ޑޮލަރ ލިމިޓް އިތުރަށް ތިރިކުރުން ހިމެނެއެވެ. ބޭންކުން އަޅާފައިވާ މި ފިޔަވަޅުތަކުގެ ނަތީޖާއެއްގެ ގޮތުން ކުދި އަދި މެދުފަންތީގެ ވިޔަވާރިވެރިން ކުރަމުންއަންނަ މުއާމަލާތްތަކަށް އިތުރު ދަތިތަކާވަނީ ކުރިމަތިލާންޖެހިފައެވެ.

އެމްޓީއޭގެ ބަޔާނުގައި ބުނެފައިވެއެވެ.

އެމްޓީއޭއިން އިތުރަށް ބުނެފައިވަނީ، މިހާލަތުގައި، އިގްތިސާދަށް ކުރިމަތިވަމުންދާ ގޮންޖެހުންތަކުން އަރައިގަނެ، އާންމު ވިޔަފާރިވެރިންނަށް ކުރިމަތިވަމުންދާ ގޮންޖެހުންތައް ކުޑަކުރުމަށް ސަރުކާރުން ކުއްލި ފިޔަވަޅުތަކެއް އަޅަން ޖެހިފައިވާކަން އެޖަމިއްޔާއިން ދެކޭ ކަމުގަވެ. އޭގެ ތެރޭގައި ބޭރު ފައިސާ ލިބޭ މައިގަނޑު ދާއިރާތަކުން، ޚާއްޞަކޮށް ފަތުރުވެރިކަމުގެ ދާއިރާއިން ލިބޭ ޑޮލަރު ސީދާ ސަރުކާރަށް ވިއްކުމަށް ބާރުއެޅުމާއި، އަދި ޑޮލަރު ބޭނުންކުރެވޭނެ ދާއިރާތައް ވަގުތީގޮތުންނަމަވެސް ހަނިކުރަންޖެހޭކަމަށް އެޖަމިއްޔާއިން ދެކޭކަމަށްވެސް ބުނެފައު ވެއެވެ.

ހަމައެއާއެކު ދައުލަތުގެ ޚަރަދު ކުޑަކޮށް، ސިޔާސީ ވަޒީފާތައް މަދުކޮށް، ދައުލަތުގެ ކުންފުނިތަކުގައި ހިނގަމުންދާ ކޮރަޕްޝަންގެ އަމަލުތައް ހުޓުވުމަކީ މިހާރުން މިހާރަށް ސަރުކާރުން މުހިންމު ފިޔަވަޅުތަކެއް އަޅާންޖެހިފައިވާ މައްސަލަތަކެއްގެ ގޮތުގައިވެސް އެމްޓީއޭގެ ބަޔާނުގައި ފާހަގަ ކޮށްފައި ވެއެވެ.

ރާއްޖޭގެ އިގްތިސާދަށް ކުރިމަތިވަމުންދާ ބޮޑެތި ގޮންޖެހުންތަކުން އަރައިގަނެ، މި ހާލަތުގައި ވިޔަފާރިތަކަށް މުދާ އެތެރެކުރުމަށް ބޮޑެތި ގޮންޖެހުންތަކާ ކުރިމަތިލާން ޖެހިފައިވާއިރު، މިހާލަތުން އަރައިގަތުމަށް އަވަސް ހައްލެއް ހޯދައިދިނުމަށް ސަރުކާރުން ހަރުދަނާ ފިޔަވަޅުތައް އެޅުމަށް އެ ޖަމިއްޔާއިން ސަރުކާރަށް ގޮވާލާފައި ވެއެވެ.