އާ ސަހަރާގެ މަސައްކަތް ސެޕްޓެމްބަރު މަހުގެ ނިޔަލަށް ނިންމާލެވޭނެކަމަށް މާލޭ ސިޓީ މޭޔަރު އާދަމް އާޒިމް ވިދާޅުވެއްޖެއެވެ. އާ ސަހަރާ މަރާމާތުކުރުމަށްޓަކައި މިދިޔަ އަހަރުގެ މެއި މަހު ވަޅުލުމުގެ މަސައްކަތް ހުޅުމާލެއަށް ބަދަލުކުރެވުނެވެ. މެދުކެނޑިފައިވާ މަސައްކަތް ނިންމުމަށް މިއަހަރުގެ މެއި މަހުގެ ފަހުކޮޅު ހަވާލުކުރެވުނެވެ.
މި މަޝްރޫޢުގެ ދަށުން މިސްކިތް މަރާމާތުކުރުމާއި ޖަނާޒާއަށް ދާ މީހުންނަށް ޚާއްޞަ ސަރަޙައްދެއް ތަރައްޤީކުރުން ހިމެނެއެވެ. މަޝްރޫޢުގެ މައިގަނޑު މަސައްކަތްތައް ނިމިފައިވާކަމަށާއި ސެޕްޓެމްބަރު މަހު މުޅި މަޝްރޫޢު ނިމޭނެކަމަށް މޭޔަރު ވިދާޅުވިއެވެ.
މަސައްކަތް ލަސްވެފައިވަނީ ޕްރޮޖެކްޓް ސްކޯޕަށް ގެނެވުނު ބޮޑެތި ބަދަލުތަކާ ގުޅިގެންނެވެ. މިސްކިތުގެ މަސައްކަތް ނިމޭއިރު 3200 އަކަފޫޓު އިތުރުވާނެކަމަށް މޭޔަރު ވިދާޅުވިއެވެ. އަދި ނުކުޅެދުންތެރިކަން ހުންނަ މީހުންނަށާއި އަންހެނުންނަށް ޚާއްޞަ ފާޚާނާތަކާއި ވުޟޫކުރާ ތަނެއް ހިމެނޭނެއެވެ.
އާ ސަހަރާއަށް ގެނެވޭ ބަދަލުތަކުގެ ތެރޭގައި އަންހެނުންނާއި ފިރިހެނުންނަށް ނަމާދުކުރާ ޖާގަ އިތުރުކުރުމާއި، އަންހެނުންނަށް ޚާއްޞަ ވުޟޫކުރާ ތަނަކާއި، މަޑުކޮށްލައިގެން ތިބެވޭނެ ވެއިޓިންގ އޭރިއާއެއް ހިމެނެއެވެ.
މީގެ އިތުރުން، މާލޭ ސިޓީ ކައުންސިލުގެ ބެލުމުގެ ދަށުގައިވާ އެހެނިހެން މިސްކިތްތަކާއި ޕާކުތަކާއި އެހެން ތަންތަނުގެ އާބާތުރަ ފިލުވުމުގެ މަސައްކަތްތައްވެސް ކައުންސިލުން ކުރިއަށް ގެންދެއެވެ.
